Qazaqstanda 2027 jylǵy 1 qańtardan bastap kásiporyndar jasandy intellektini paidalaný týraly jyl saiyn esep beredi. Jańa talapqa sai uiymdar JI tehnologiialaryn qalai jáne qandai maqsatta qoldanyp jatqanyn kórsetýge tiis. Al jasandy intellektini paidalanbaityn kásiporyndar onyń sebebin túsindiredi, dep habarlaidy dalanews.kz.
Ulttyq statistika biýrosy basshysynyń buiryǵymen «Kásiporyndarda jasandy intellektini paidalaný týraly esep» dep atalatyn 1-JI statistikalyq nysany bekitildi. Esep jylyna bir ret tapsyrylady.
Jańa talap aýyl, orman jáne balyq sharýashylyǵy, taý-ken jáne óńdeý ónerkásibi, energiia jáne sýmen jabdyqtaý, qaldyqtardy jinaý men óńdeý, kólik jáne qoima salalarynda jumys isteitin, qyzmetkerleriniń sany 100 adamnan asatyn zańdy tulǵalarǵa qatysty. Sonymen qatar esepti memlekettik basqarý salasyndaǵy jekelegen organdar da tapsyrady.
Jasandy intellektini qoldanbaityn uiymdar oǵan kedergi keltiretin negizgi eki sebepti kórsetýi kerek. Olardyń qatarynda qarjynyń, bilikti mamandardyń, sapaly derekterdiń, esepteý qýatynyń nemese naryqtaǵy daiyn sheshimderdiń bolmaýy bar. Sondai-aq ákimshilik kedergilerdi, JI-di qoldaný joldary týraly aqparattyń azdyǵyn jáne tehnologiia qaýipsizdigine qatysty túsiniktiń jetkiliksizdigin kórsetýge bolady.
Budan bólek, kásiporyndar jasandy intellektini aldaǵy eki, bes nemese on jyl ishinde engizýdi josparlai ma, álde múldem qoldanbai ma — sony habarlaidy. Alaida jańa talap uiymdardy JI tehnologiialaryn mindetti túrde engizýge mindettemeidi.
Jasandy intellektini qoldanyp júrgen kásiporyndar qandai tehnologiialardy jáne olardy qandai mindetter úshin paidalanatynyn kórsetedi. Olardyń arasynda mátin men sóileýdi óńdeý, kompiýterlik kórý, mashinalyq oqytý, JI-agentteri men robottar bar. Sondai-aq JI-diń óndiriste, saýdada, logistikada, qarjylyq esep júrgizýde, qyzmetkerlerdi basqarýda jáne jańa ónimder ázirleýde qoldanylýy týraly málimet jinalady.
Esepte jasandy intellektini qoldanýdyń nátijesi de baǵalanady. Kásiporyndar bul tehnologiianyń eńbek ónimdiligine, shyǵyndarǵa, operatsiialardy oryndaý merzimine, tabysqa jáne basqarýshylyq sheshimderdiń sapasyna qalai áser etkenin kórsetýge tiis.
Jańa statistikalyq esep Qazaqstan kásiporyndarynda jasandy intellektiniń qanshalyqty keń taralǵanyn jáne ony engizýge qandai faktorlar kedergi keltiretinin anyqtaýǵa múmkindik beredi.
