Almaty oblysynyń Shamalǵan aýylynda moped mingen kámeletke tolmaǵan jasóspirim velosiped teýip kele jatqan er adamdy qaǵyp, ol aýrýhanada qaitys boldy, dep habarlaidy dalanews.kz.
Oqiǵa 2 mamyrda bolǵan. Marqum bazarǵa velosipedpen bara jatqan kezde jasóspirim mingen moped ony qaǵyp ketken. Er adam aýyr jaraqat alyp, bas súiegi synyp, ota jasalǵan. Keiin aýrýhanada kóz jumǵan.
Marqumnyń jaqyndarynyń aitýynsha, jol apatynan keiin otbasy onyń emine qajetti dári-dármekti óz qarajatyna izdegen. Keibir dárilerdi Tashkentten aldyrýǵa týra kelgen. Olardyń sózinshe, moped mingen jasóspirim tarapynan emge 180 myń teńge kóleminde ǵana kómek kórsetilgen.
Atalǵan jaǵdaiǵa qatysty zańger Abzal Qasymjanovtyń túsindirýinshe, Qazaqstanda qylmystyq jaýapkershilik jalpy ereje boiynsha 16 jastan bastalady. Alaida abaisyzda adamnyń ólimine ákelgen jol qozǵalysy erejesin buzý boiynsha jaýapkershilik 14 jastan bastalatyn qylmystar qataryna kirmeidi. Sondyqtan jol apaty kezinde 16 jasqa tolmaǵan jasóspirimdi osy bap boiynsha qylmystyq jaýapkershilikke tartý múmkin emes.
Sonymen birge bul politsiia jol apatyn teksermeýi kerek degendi bildirmeidi. Mamandardyń aitýynsha, quqyq qorǵaý organdary oqiǵanyń barlyq mán-jaiyn anyqtap, jol apaty men er adamnyń ólimi arasynda sebeptik bailanys bar-joǵyn saraptama arqyly belgileýi tiis.
Bul rette másele jasóspirimniń jaýapkershiligimen ǵana shektelmeidi. Kámeletke tolmaǵandardyń moped basqarýyna jol bermeý jáne olardyń joldaǵy qaýipsizdigin baqylaý boiynsha profilaktikalyq jumystyń qanshalyqty tiimdi júrgizilgeni de tekserilýi kerek.
Marqumnyń otbasy kináli áreketterdiń anyqtalýyn, sondai-aq keltirilgen materialdyq jáne moraldyq ziiannyń ótelýin talap etýge quqyly.
Almaty oblysynyń politsiia departamentine osy oqiǵa boiynsha túsinikteme suralǵanymen, atalǵan material jariialanǵan ýaqytqa deiin vedomstvo jaýap bermegen.
