Áleýmettik jelilerde AQSh-tan kelgen jýrnalist Hoýp Laýdon Qazaqstanda taksi júrgizýshisi tarapynan qolaisyz jaǵdaiǵa tap bolǵanyn málimdedi, dep habarlaidy Dalanews.kz.
Jýrnalist buǵan deiin Saryaǵashta bastan ótkergen oqiǵany baiandaǵan bolatyn. Vizasy bolmaǵandyqtan, ony Tashkentke bara jatqan poiyzdan túsirip ketken. Sóitip Hoýp Laýdon bailanyssyz, biletsiz ári qolma-qol aqshasyz qalǵan. Bul sátte oǵan jergilikti jasóspirim kómek qolyn sozǵan: ol qolma-qol aqsha alýǵa kómektesip, tanymal mobildi qosymsha arqyly Shymkentke baratyn taksi shaqyryp bergen.
"Jasóspirim meni shetelden kelgen kómekke muqtaj áiel retinde qabyldady, al taksi júrgizýshisi bolsa, meniń osaldyǵymdy paidalanǵysy keldi. Jol bastala salysymen-aq birtúrli jaǵdai sezildi, biraq túsip qalý kesh edi, mende basqa tańdaý bolmady. Júrgizýshi jyldamdyqty 140 shaqyrymǵa deiin jetkizip, jol boiy telefonynan kóz almady. Ol "mekenjai tym alys" dep qosymsha 5000 teńge talap etti. Bul negizsiz edi, ári mende qolma-qol aqsha bolmaǵan soń, tóleýden bas tarttym", – dedi Hoýp.
Onyń aitýynsha, jol boiy taksi júrgizýshisi birneshe márte bireýlerge qońyraý shalyp, "amerikalyq áieldi" alyp bara jatqanyn aityp maqtanyp otyrǵan. Hoýp bul áreketti júrgizýshiniń áldebir aram nietti josparymen bailanystyrdy.
"Shymkentke jetkende júrgizýshi meni jetkizip salatynyn, biraq aldymen bir jerge soǵatynyn aitty. Men ony qala syrtyna shyǵaryp, zorlyq kórsetýdi oilady dep kúdiktenemin. Men dereý qala ishinde túsirip ketýin talap ettim", – deidi jýrnalist.
Onyń sózinshe, sapar sońynda júrgizýshi sómkesin óz betimen alýǵa múmkindik bermegen, sol sátti paidalanyp, intimdi jerinen ustaýǵa áreket jasaǵan.
"Men dereý burylyp, onyń jeidesinen ustap, qatty aiǵailap jiberdim. Osy áreketim ony toqtatty", – dep eske aldy amerikalyq azamat.
Shymkent qalalyq politsiia departamenti bul oqiǵaǵa qatysty túsinikteme berdi. Vedomstvonyń málimetinshe, taksi júrgizýshisi anyqtalyp, jaýap alynǵan.
"Ol usaq buzaqylyq pen jol qozǵalysy erejesin buzǵany úshin ákimshilik jaýapkershilikke tartyldy. Sheteldik azamatqa barlyq qajetti kómek kórsetildi", – dep habarlady departament ókili.
