Memleket basshysy Qasym-Jomart Toqaev Ankarada YDA Holding basqarma tóraǵasy Hýsein Arslandy qabyldady, dep habarlaidy Dalanews.kz.
Aqorda baspasóz qyzmetiniń habarlaýynsha, Qasym-Jomart Toqaevqa YDA Holding kompaniiasynyń Qazaqstanda iske asyrylyp jatqan investitsiialyq jobalary jóninde málimet berildi.
Atap aitqanda, túrkiialyq holding Túrkistan, Astana jáne Petropavl qalalarynda kópbeiindi aýrýhanalar salý jáne paidalaný boiynsha úsh jobany qolǵa alǵan.
Kompaniia aldaǵy ýaqytta Astanadaǵy YDA Industrial Park kópsalaly óndiris keshenin keńeitip, sendvich-panelder shyǵaratyn zaýyt salýdy bastaidy.
Sonymen qatar Hýsein Arslan kompaniianyń Aqtaýda mýltimodaldi tranzit habyn qurýǵa qatysty josparymen bólisti.
Memleket basshysy holdingtiń Qazaqstanǵa strategiialyq turǵydan qyzyǵýshylyǵyn jáne elimizde júzege asyryp jatqan investitsiialyq bastamalaryn joǵary baǵalady.
Aita ketsek, keshe túnde Qazaqstan Prezidenti Túrkiiaǵa resmi saparmen bardy. Memleket basshysyn Ankara qalasynyń "Esenboǵa" áýejaiynda Túrkiia Prezidenti Rejep Taiip Erdoǵannyń ózi arnaiy qarsy alǵan bolatyn. Sondai-aq saiasattanýshy Ashat Qasenǵli Memleket basshysynyń Ankaraǵa saparyna qatysty pikir bildirdi.
Búgin Memleket basshysynyń Túrkiia Respýblikasyna resmi sapary osy eldiń negizin qalaýshy ári tuńǵysh Prezidenti Mustafa Kemal Atatúriktiń kesenesinen bastalǵany habarlandy.
