Bir maýsymda 2,8 million kórermen: qazaqstandyq teatrlarǵa suranys artyp keledi

Qazaqstannyń memlekettik teatrlary repertýaryn tolyqtyryp, jańa qoiylymdardy kórermen nazaryna usynyp keledi. Biylǵy teatr maýsymynda elimizdiń sahnalarynda drama, opera, balet, mýzykalyq komediia, balalar men jasóspirimderge arnalǵan spektaklderdi qamtyǵan júzdegen premera ótti, dep habarlaidy dalanews.kz.

Memleket basshysy Qasym-Jomart Toqaev mádeniet pen ónerdi damytýǵa, ulttyq bolmysty nyǵaitýǵa jáne shyǵarmashylyq ujymdardy qoldaýǵa basymdyq beredi. Sonyń nátijesinde Maksim Gorkii atyndaǵy Memlekettik akademiialyq orys drama teatryna «Ulttyq» mártebe berý, al Soltústik Qazaqstan oblystyq Sábit Muqanov atyndaǵy qazaq sazdy-drama teatryna «Akademiialyq» mártebe berý jóninde sheshim qabyldandy.

Teatrlardyń mártebesin arttyrýmen qatar, mádeni infraqurylymdy jańǵyrtý jumystary da jalǵasyp jatyr. Atap aitqanda, Muhtar Áýezov atyndaǵy Qazaq ulttyq drama teatry men Nataliia Sats atyndaǵy orys memlekettik akademiialyq balalar men jasóspirimder teatry ǵimarattaryn qaita jańǵyrtý jumystary júrgizilýde.

Búginde elimizde opera, balet, drama, mýzykalyq komediia, qýyrshaq, balalar jáne jasóspirimder teatrlaryn qosa alǵanda, túrli baǵyttaǵy 59 memlekettik teatr jumys isteidi. Teatr salasynda 8,1 myńnan astam adam eńbek etedi.

Maýsym bastalǵaly memlekettik teatrlarda 16 myńnan astam spektakl men mádeni baǵdarlama kórsetildi. Olardy 2 832 835 kórermen tamashalady. 410 jańa qoiylym men baǵdarlama sahnalandy.

Maýsymnyń eleýli premeralary qatarynda «Astana Opera» teatryndaǵy «Qypshaq qyzy Appaq» operasy, Abai atyndaǵy Qazaq ulttyq opera jáne balet teatryndaǵy «Han Sultan. Altyn Orda» operasy, sondai-aq «Astana Balet» teatryndaǵy «Carmina Burana» baleti men «Qarlyǵash», «Bolero H» horeografiialyq miniatiýralary bar.

Jańa qoiylymdar drama jáne mýzykalyq komediia teatrlarynda da sahnalandy. Ǵabit Músirepov atyndaǵy Memlekettik akademiialyq balalar men jasóspirimder teatrynda «Gamlet» pen «Qorǵansyz» spektaklderiniń premerasy ótti. Quddys Qojamiiarov atyndaǵy Respýblikalyq memlekettik akademiialyq uiǵyr mýzykalyq komediia teatrynda «Revizor», Mihail Lermontov atyndaǵy Ulttyq orys drama teatrynda «Jenitba», al Respýblikalyq memlekettik akademiialyq korei mýzykalyq komediia teatrynda «Mahabbat bárin jeńedi» qoiylymdary kórermenge jol tartty.

Maýsym aiaqtalǵanǵa deiin de birqatar jańa premera usynylady. 26 maýsymda «Astana Balet» teatry «Altyn gúl» baletin sahnalasa, 27 maýsymda Qalibek Qýanyshbaev atyndaǵy Qazaq ulttyq mýzykalyq drama teatrynda Ábdijámil Nurpeiisovtiń shyǵarmasy negizinde qoiylǵan «Qan men ter» spektakliniń premerasy ótedi.