Abai oblysynyń Aiagóz qalasynda jol qozǵalysy erejelerin avtomatty túrde tirkeitin kamera júiesiniń baptaýlarynan qatelik anyqtaldy. Sonyń saldarynan 172 júrgizýshi ákimshilik jaýapkershilikke zańsyz tartylǵan, dep habarlaidy dalanews.kz.
Oblystyq prokýratýranyń málimetinshe, másele Aiagóz aýdandyq prokýratýrasynyń tekserýi barysynda belgili bolǵan.
Tekserý kezinde qala kósheleriniń birinde ruqsat etilgen jyldamdyq 60 km/saǵ bolǵanyna qaramastan, avtomatty baqylaý júiesine 40 km/saǵ shekteýi engizilgeni anyqtaldy. Sonyń saldarynan júrgizýshiler is júzinde ereje buzbasa da, júie olardy quqyq buzýshy retinde tirkep otyrǵan.
Qate baptaýdyń nátijesinde 172 adamǵa zańsyz aiyppul salynǵan. Prokýratýranyń usynysynan keiin barlyq zańsyz qaýlylardyń kúshi joiylyp, tólengen qarajatty qaitarý jumystary bastaldy.
Búgingi kúnge deiin kólik ielerine 800 myń teńgeden astam qarjy qaitarylǵan. Bul baǵyttaǵy jumystar áli de jalǵasyp jatyr.
Prokýratýra ókilderi zańsyz ákimshilik jaýapkershilikke tartylǵanyn anyqtaǵan azamattarǵa ýákiletti memlekettik organdarǵa nemese prokýratýraǵa júginýge bolatynyn eske saldy.
