«Daryn» respýblıkalyq jalpy bilim beretin pánder boıynsha olımpıadanyń jelilik kezeńinde Almaty qalasyndaǵy hımıa-bıologıa baǵytyndaǵy NIS komandasy otyzdan astam júldeli oryndarǵa ıe bolyp bıikten kórindi. Jalpy bilim dodasynda Zıatkerlik mektepterden myńnan asa oqýshy baq synap jaratylystaný-matematıkalyq jáne qoǵamdyq-gýmanıtarlyq baǵyttar boıynsha joǵary bilimderin kórsetti.
Almaty qalasyndaǵy Zıatkerlik mekteptiń oqýshylary 5 altyn, 8 kúmis jáne 19 qola medalge qol jetkizdi.
Jeńimpazdar qatarynda «TUYMAADA» halyqaralyq Mendeleev olımpıadasynyń eki dúrkin júldegeri Eńlik Baqytbekova bar. Bıylǵy jylǵy mektep túlegi hımıany 7-synyptan bastap tańdady, jáne olımpıadalarǵa qatysyp bilimin jetildirip keledi.
– Hımıa maǵan óte qatty unaıdy, kúndelikti ómirmen tike baılanysty, úńilseńiz óte qyzyqty dúnıelerdi óziń úshin ashyp tań qalasyz. Al olımpıadaǵa qatysqan saıyn pánniń jańa qyryn ashasyń. Keleshektede mamandyǵymdy hımıamen baılanystyramyn,- dep bólisti Eńlik.
Eńliktiń jetekshisi , «Qazaqstannyń úzdik ustazy» ataǵynyń ıegeri Sholpan Ábisheva Eńliktiń eńbekqorlyǵyn erekshe aıtady:
Baqytbekova Eńlik – árqashan aldyna maqsat qoıatyn jan. Ol naqty jospar qurýdy biledi jáne ony oryndaı otyryp, óz maqsattaryna tez jáne tıimdi qol jetkizedi. Eńlik 2023 jyly Qazaqstan Bilim olımpıadasynda ekspert bolyp, baǵalaýǵa qatysty. Hımıadan bólek matematıka, geografıa, bıologıa pánderi boıynsha keshendi olımpıadaǵa qatysyp 1-oryn ıelendi, ǵylymı jobalardyń avtory. Júz elýden astam ǵylymı jumystardy zerttep, materıaldardyń qasıetterin zertteý ádisterin meńgerdi.
Daryndy oqýshy NÝ profesory Haııan Fanmen birlesip sý obektileriniń aýyr metaldarmen jáne boıaǵyshtarmen lastanýyn zertteıtin ǵylymı zertteý jumysyn júrgizip, banan qabyǵynan belsendirilgen kómir alý ádisin ázirledi.
Almaty qalasyndaǵy Zıatkerlik mektep hımıa-bıologıa baǵyty ataǵyn aqtap keledi. Oǵan dálel retinde jylda hımıa-bıologıa salasyndaǵy oqýshylardyń jetistikterin keltirýge bolady. Pán muǵalimderi de bilimderin shyńdap, biliktilikterin arttyryýda. Osy Olımpıadada hımıa páninen jalpy 6 medal mektep qorjynyn tolyqtyrdy.
Aıta ketý kerek, qazirgi tańda Nazarbaev Zıatkerlik mektepterine úmitkerlerdiń qujattary qabyldaný ústinde. 11 aqpanǵa deıin qalaǵan Zıatkerlik mektepke baryp konkýrstyq irikteýge qatysý úshin elimizdiń 6-synyp oqýshylary qujattaryn tapsyra alady.
