Juma kúni, 17 qańtarda Ulttyq Bank bazalyq mólsherleme boıynsha kezekti sheshimin jarıalaıdy, qazirgi ýaqytta onyń mólsheri - 15,25% . Bul rettegi aldyn ala boljammen Halyk Finance bólisip úlgerdi, dep jazady Dalanews.kz.
"Ótken jyldyń sońynda ınflásıalyq táýekelderdiń kúsheıýi jaǵdaıynda monetarlyq retteýshi bazalyq mólsherlemeni birden 1 paıyzdyq tarmaqqa kóterdi, bizdiń oıymyzsha, sol kezge qabyldanǵan bul sheshim daýly bolyp tabylady. Aǵymdaǵy údegen ınflásıany, alda ınflásıanyń kúsheıý yqtımaldyǵy boıynsha boljamdardyń artýyn jáne teńgeniń áli de bosańsýyn toqtatpaýyn nazarǵa ala otyryp, Ulttyq Bank bazalyq mólsherlemeniń qazirgi deńgeıin saqtap qalý yqtımaldyǵy joǵary, oǵan jalpy yntalandyrýshy fıskaldyq saıasattyń saqtalýy, aıyrbas baǵamynyń álsireýi, sondaı-aq retteýge jatatyn baǵalardyń ósip jatýy negiz bola alady", - dep jazady Halyk Finance basqarma tóraǵasynyń keńesshisi Murat Temirhanov.
2024 jylǵy jeltoqsanda ınflásıanyń qarasha aıymen salystyrǵanda (8,4%) údeýi baıqaldy: jeltoqsannyń qorytyndysy boıynsha 8,6%. Ulttyq bank málimetinshe, halyq pen Qazaqstan naryǵynyń kásibı qatysýshylarynyń ınflásıa boıynsha aldan kútetin sıfrlary taǵy da nasharlaı tústi. Bir jyldan keıin kútiletin ınflásıa deńgeıi qarashadaǵy 14,1% - dan jeltoqsanda 14,6%-ǵa deıin ósti. Sonymen qatar, sońǵy 12 aıda sezilgen ınflásıanyń medıanalyq máni 13,2%-ǵa deıin ósti (qarashada 13,0%), onda da jeltoqsanda naqty jyldyq tutynýshylyq ınflásıa 8,6% deńgeıde bolǵanda.
Baǵalar men ınflásıalyq kútýler ósiminiń mańyzdy faktory bolyp aqyly qyzmetterdiń, atap aıtqanda, memleket retteıtin jáne bazalyq mólsherlemeniń ózgerýine qatysty áreketke beıim emes TKSH qyzmetteri tarıfteriniń ósýi bolyp tabylady.
Qańtardaǵy valútaǵa suranys maýsymdyq jaǵdaıda salystyrmaly túrde tómen boldy, sondyqtan aǵymdaǵy aıdyń basynda biz kvazımemlekettik sektor sýbektileriniń valútalyq túsiminiń 50%-yn mindetti túrde satý normasyn jáne Ulttyq qordan alynatyn transfertterdiń joǵary deńgeıin eskere otyryp, qańtardaǵy teńgege shaqqandaǵy dollar baǵamy qazirgi syrtqy jáne ishki jaǵdaılar saqtalǵan kezde ótken jylǵy jeltoqsandaǵy deńgeıin saqtaıdy dep boljaımyz.
"Alaıda, qańtarda Reseıge salynǵan qosymsha sanksıalardan keıin teńgeni nyǵaıtýy tıis munaı baǵasy óse bastaǵanyna qaramastan, ulttyq valúta baǵamy áli de álsireýde. İshki jáne syrtqy táýekelderdi eskere otyryp, Ulttyq bank bazalyq mólsherlemeni joǵary deńgeıde ustap, qatań aqsha-nesıe sharttaryn saqtaýǵa májbúr bolady, onyń máni aldaǵy otyrysta qazirgi kúıinde saqtalýy múmkin. Sondaı-aq, biz Ulttyq bank bazalyq mólsherlemeni bıylǵy (7 naýryz) ekinshi otyrysynda da qazirgi deńgeıde saqtaıdy dep senemiz. Jalpy, biz bıylǵy jyly bazalyq mólsherlemeniń tómendeýi áldeqaıda baıaý qarqynmen júretinin boljaımyz, óıtkeni aǵymdaǵy jyly qalyptasqan ınflásıalyq faktorlar ınflásıa boıynsha targetke qol jetkizýge kedergi keltire otyryp, orta merzimdi kezeńdegi baǵalarǵa teris áser etetin bolady", - deıdi Halyk Finance ókili.
Aıta ketsek, 2025 jyly 10 qańtarda QR Ulttyq bankiniń sarapshylar qaýymdastyǵy arasynda júrgizgen kezekti makroekonomıkalyq saýalnamanyń nátıjesi jarıalandy. Oǵan sáıkes,sarapshylar 2025 jyly kútiletin ınflásıa kólemin 6,9%-dan 7,5%-ǵa deıin kóterdi. Sondaı-aq bul taqyrypqa saı saıtymyzdaǵy "Áne, Túrkıany qarańyz! Qarjyger "bazalyq mólsherlemeni tómendeteıik" dep júrgenderdiń aýzyn japty" degen maqalany da oqı otyryńyzdar.
