Atyraýda Qarabalinder áýletiniń ólimine qatysty rezonansty qylmystyq is boiynsha sot otyrysy bastaldy. Is boiynsha Sultan Sársemáliev aiyptalýshy retinde jaýapqa tartylyp jatyr, dep habarlaidy dalanews.kz.
Tergeý dereginshe, Sársemáliev qaiyn jurtynyń qazasyna qatysy baryn moiyndaǵan.
Atalǵan isti tergegen Atyraý oblysy Politsiia departamenti tergeý basqarmasynyń asa mańyzdy ister jónindegi aǵa tergeýshisi Temirhan Qajymuratov sotta kúdiktiniń izi qalai anyqtalǵanyn aityp berdi.
Onyń sózinshe, tergeý barysynda 40-tan astam adamnan jaýap alynǵan. Olardyń qatarynda marqumdardyń týystary, kórshileri jáne oqiǵaǵa qatysty málimet berýi múmkin ózge de azamattar bolǵan.
Tergeýshi bastapqyda erli-zaiypty iz-tússiz joǵalǵandar retinde tirkelgenin aitty. Osydan keiin politsiia olardyń bank esepshottaryn tekserip, qarajat qozǵalysyn anyqtaýǵa kirisken.
"Aldymen esepshottar tekserildi. Aqsha tústi me, qai jerde jumsaldy – bári qaraldy. Sol kezde kúdikti Sársemálievtiń shotyna aqsha aýdaryp júrgeni belgili boldy. Keiin aýylǵa aparyp-ákelgen taksi júrgizýshisi anyqtaldy. Ol qarasha aiynda erli-zaiypty men balasyn jetkizgen. Qaitar jolda onyń janynda Meiramgúl Muqanǵalieva da bolǵan", – dedi Temirhan Qajymuratov.
Qazirgi ýaqytta sotta qylmystyq istiń barlyq mán-jaiy qaralyp jatyr. Tergeý tarapy bul isti asa aýyr qylmys retinde baǵalap otyr. Aiyptalýshyǵa qatysty sońǵy sheshimdi sot shyǵarady.
