Májilis depýtaty Abzal Quspan Talǵarda bir top buzaqynyń qolynan qaza tapqan 16 jastaǵy Sherzat Bolattyń ólimine qatysty qylmystyq istiń jaqynda sotqa joldanatynyn málimdedi, dep habarlaidy Dalanews.kz.
Zańger buǵan deiin Talǵarǵa baryp, politsiia jáne prokýratýra ókilderimen kezdeskenin atap ótti.
“Ótken jyldyń jeltoqsan aiynda bizge qańtar aiynyń sońyna deiin qylmystyq isti aiaqtap, sotqa joldaimyz dep ýáde bergen edi. Qazir istegi kúdiktilerdiń barlyǵy qamaýda, árqaisysyna qatysty tiisti quqyqtyq baǵa berildi. Meniń boljamymsha, is kelesi apta nemese odan keiingi aptada sotqa joldanýy kerek. Prokýratýra isti sotqa jibermes buryn arnaiy brifing ótkizýdi josparlap otyr. Qazirgi qolymdaǵy aqparat osymen shekteledi”, – dedi Abzal Quspan.
Aita keteiik, buǵan deiin depýtat Abzal Quspan marqum Sherzat pen onyń aǵasy N. Ǵaiypbaevtyń ólimi Bas prokýratýra men Ishki ister ministrliginiń baqylaýynda ekenin jetkizgen edi.
Bul týraly ol Facebook áleýmettik jelisindegi paraqshasynda jazdy.
Depýtat atalǵan is boiynsha 170-ten astam kýágerden jaýap alynyp, jan-jaqty tergelip jatqanyn alǵa tartty.
"Men, zańger retinde, bul aýyr jaǵdailardy quqyqtyq turǵyda qarastyrýdyń mańyzdylyǵyn atap ótkim keledi. Mundai isterde qoǵam tarapynan jasalǵan qysym tergeý amaldarynyń obektivti ári jan-jaqty júrgizilýine keri áserin tigizýi múmkin. Prokýratýranyń resmi aqparatyna sáikes, qasaqana kisi óltirý kúdigimen 11 adam adam ustalǵany belgili. Qazirgi tańda tiisti tergeý amaldary júrgizilip jatyr. Osy is boiynsha 170 astam kýágerlerden jaýap alynyp, 40 jýyq saraptama taǵaiyndalyp, jan-jaqty tergelip jatyr. Sonymen qatar, Sherzat Polattyń aǵasy N. Ǵaiypbaevtyń ólimi de Bas prokýratýra men Ishki ister ministrliginiń baqylaýynda ekenin atap ótken jón. Ol boiynsha sot-meditsinalyq saraptamalar júrgizilip jatyr", — dep jazdy depýtat.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Qazirgi tańda kináli dep tanylǵan 11 adam ustalyp, ýaqytsha ustaý izoliatoryna qamaýǵa alyndy.
Kóp uzamai, iaǵni 9 jeltoqsanda marqum Sherzat Bolattyń aǵasy Nurqanat Ǵaiypbaev ajal qushty. Politsiia departamenti onyń sýitsid jasaǵanyn málimdedi. Oǵan dálel retinde politseiler Nurqanattyń týysyna messendjer arqyly jazǵan hatyn jariia etti.
Habarlamada ol týysqandarymen qoshtasyp, jieniniń janyna jerleýdi suraǵan. Bul fakti boiynsha qylmystyq is qozǵaldy.
Al 10 jeltoqsanda onyń ólimine qatysty saraptama qorytyndysy shyqty.
"Sot-meditsinalyq saraptamanyń aldyn ala boljamy boĭynsha, 9 jeltoqsanda Talǵardyń shetinde tabylǵan 30 jastaǵy er adamnyń máĭiti ózin-ózi asý arqyly mehanikalyq asfiksiia nátijesinde bolǵanyn kórsetti. Denesinde zorlyq-zombylyq sipattaǵy belgiler joq.
Sarapshylarmen anyqtalǵan dene jaraqattary, mysaly, strangýliatsiialyq jáne moĭynnyń abraziialary asylǵan jipti qoldanǵan kezinde paĭda bolatyn jaraqattarǵa sáĭkes keletinin kórsetti. Barlyq belgiler sýitsidti kórsetedi, moĭynyndaǵy zaqymdaný sipaty mundaĭ jaǵdaĭlarǵa tán", - delingen habarlamada.
Al marqum Sherzattyń ákesi baýyry Nurqanat Ǵaiypbaevty jer qoinyna tapsyrǵanan keiin, buqaralyq aqparat quraldarymen kezdesýdi talap etip, kóshege shyqty. Alaida araǵa uzaq ýaqyt salmai Qarjaýbai Nurymovty politsiia qyzmetkerleri ustap áketti.
"Qarjaýbai Nurymov prokýrordyń zańdy saqtaý týraly túsindirmelerin elemedi. Shekten tys agressivti minez-qulyq tanytyp, basqalardy óz-ózine qol jumsaimyn dep qorqytty. Sonymen qatar politsiia qyzmetkerine pyshaqpen shabýyl jasady. Onyń minez-qulqy ózine de, basqalarǵa da qaýip tóndirdi", — delingen habarlamada.
Osylaisha Sherzat Bolattyń ákesi men ápkesi qamaýǵa alyndy.
