Japoniia 10 qańtarda ótken úkimet otyrysynda Ýkrainadaǵy jaǵdaiǵa bailanysty sanktsiialar aiasyn taǵy da keńeitti. Bul arada Resei jáne basqa elderdiń kompaniialary eksportyna qatysty tyiym týraly sóz bolyp otyr. Oǵan 335 pozitsiia enedi, sonyń ishinde kran men mototsikl siiaqty arnaiy kólikterge arnalǵan qozǵaltqysh bólshekterin, sondai-aq Reseidiń ónerkásiptik qýatyn nyǵaitýǵa kómektesetin taýarlar da bar. Sondai-aq olardyń arasynda bas keńsesi Astanada ornalasqan Da Group 22 atty qazaqstandyq kompaniia da júr, dep jazady Dalanews.kz.
Bul týraly sanktsiiaǵa qatysty Japoniianyń Syrtqy ister ministrliginiń saityndaǵy aqparatta aitylady.
Ashyq derek kózderden belgili bolǵandai, "Da group 22" JShS 2022 jyly qurylǵan. Ol elektrondy jáne telekommýnikatsiialyq jabdyqtar men olardyń qosalqy bólshekteri kóterme saýdasymen ainalysady. Bul kompaniia Eýropalyq Odaq pen AQSh-tyń sanktsiialar tizimine de engen bolatyn. Ol kezde bul málimteke túsinikteme bergen QR saýda jáne integratsiia ministrligi Batys elderiniń osy kompaniiaǵa sanktsiia salǵaly jatqandaryn aldyn ala bilgenderin, bul vedomstvonyń syrtqy seriktestermen sanktsiialar máselesi boiynsha bolǵan dialog kezinde aitylǵanyn naqtylady.
Bul – sanktsiiaǵa ushyraǵan qazaqstandyq kompaniiaǵa qatysty málimet.
"Sondai-aq Japoniia sanktsiiasymen qarý-jaraqqa qajetti kapsaitsin siiaqty himiialyq zattardyń da eksportyna tyiym salady", dep jazady Nikkei.com.
Japoniianyń Ekonomika, saýda jáne ónerkásip ministrliginiń saityndaǵy aqparat boiynsha atalǵan sanktsiialar 23 qańtardan bastap óz kúshine enedi. Oǵan sáikes, reseilik 11 jeke tulǵa men 29 uiymnyń, úsh banktiń (TsMRBank, RFK Bank jáne Timer Bank) aktivteri buǵattalmaq. Sondai-aq, aktivterdi buǵattaý KHDR-dyń bir azamaty men grýzinniń MRB Bank-ine de qamtidy.
Eksportqa tyiym Resei Federatsiiasynyń 22 uiymyna jáne Resei Federatsiiasynyń sanktsiialardan ainalyp ótýine kómektesti dep kúdikke ilingen basqa elderdiń 31 uiymyna áser etedi. Olardyń qatarynda BAÁ (1), QHR (18), Qazaqstan (1), Qyrǵyzstan (2), Túrkiia (8) syndy elderdiń kompaniialary bar. Bul jaǵdaida sharalar 17 qańtardan bastap kúshine enedi.
2024 jyly 31 qazanda saitymyzda "Reseige qarsy jańadan engizilgen sanktsiia tiziminde qazaqstandyq kompaniia da júr" degen maqala jariialanǵan. Sóz etilip otyrǵan kompaniia ataýy bul arada da atalady.
