Búgin Májiliste «QR keibir zańnamalyq aktilerine sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly» zań jobasy baiandaldy. Depýtat Edil Jańbyrshin Májilis otyrysynda Sybailas jemqorlyqqa qyzmet ókiline ashyq eskertý jasady, - dep habarlaidy Dalanews.kz.
Edil Jańbyrshin zańdy quptaitynyn, alaida quzyrly organdar muny ózinen bastaý kerek ekenin aitty.
«Durys zań. Eń birinshi jemqorlyqty quqyqty qorǵaý organdary ózderinen bastaý kerek. Birinshi ózderińdi tazalap alyńdar. Birinshi ózderiń durys jumys isteńder. Ózderiń paraǵa itermelemeńder. Sol kezde bári jaqsy bolady», — dedi ol.
Sybailas jemqorlyqqa qarsy is-qimyl agenttigi tóraǵasynyń birinshi orynbasary Ulan Sarqulov depýtattyń saýalyna jaýap berip, bári tekseriletinin málimdedi.
«Quqyq qorǵaý organdarynyń qyzmetkerlerine bailanysty aitqanyńyzǵa tolyǵymen kelisemin. Tek taza qyzmetkerler jumys isteýi kerek. Arnaiy bólimsheler, arnaiy basqarmalar bar. Bizge málimet berseńiz, mindetti túrde tekseremiz», — dedi ol.
