Depýtat Anas Baqqojaev aǵasynyń anasyna qurmetsizdik kórsetýine qatysty ne oilaitynyn aitty, dep habarlaidy Dalanews.kz Nege.kz-ke siltep.
Buǵan deiin Astanadaǵy sot májilis depýtaty Anas Baqqojaevtyń aǵasy Arys Baqqojaevty otbasy-turmystyq qatynastar salasynda quqyqqa qaishy áreket jasaǵany úshin kináli dep tanyǵanyn habarlaǵan edik. Ol mas kúiinde óz anasyna balaǵat sózder aityp, qurmetsizdik tanytyp, onyń tynyshtyǵyn buzǵan. Sot oǵan mundai áreketterge jol berilmeitinin eskertip, bir jyl boiy jábirlenýshiniń kelisiminsiz oǵan jaqyndaýǵa, sondai-aq spirttik ishimdikter men psihotroptyq zattar qoldanýǵa tyiym saldy.
Májilis kýlýarynda jýrnalist depýtat Baqqojaevtan osy jaǵdaiǵa qatysty pikirin suraǵan. Onyń aitýynsha, ol bul oqiǵa týraly alǵash ret estip tur jáne anasynyń bul jaǵdaidy odan jasyrǵan bolýy múmkin dep boljady.
Parlament múshesi balalardyń ata-anasyna qurmetsizdik tanytýyna qarsy ekenin aitty. Degenmen, ol baýyryna janashyrlyq tanytyp, onyń ajyrasý men balasymen aralasa almaýynan qatty kúizelip júrgenin atap ótti.
«Ajyrasý kezinde ákelerge de ońai emes. Sebebi kóbinese analar balalardy ákelerine qarsy qoiady. Shynyn aitqanda, meniń aǵam dál sondai jaǵdaiǵa tap boldy. Er adamdardyń da quqyǵyn qorǵaý kerek dep sanaimyn», – dedi ol.
Jýrnalist otbasylyq qiyndyqtar anaǵa degen qurmetsizdikti aqtai ma dep naqtylady.
«Joq. Bul oǵan olai jasaýǵa ruqsat bermeidi jáne onyń isin aqtai almaidy. Biz anamyzdy qurmetteýimiz kerek. Ol – meniń týǵan aǵam. Ákemiz erte qaitys boldy, biz tórt jasymyzda ákesiz qaldyq. Anamyz eki balany jalǵyz ózi tárbielep ósirdi jáne bizdi jaqsy tárbieledi. Múmkin, ol bul áreketke kúizelisten barǵan shyǵar. Biraq men bul týraly shynymdy aitsam, bilmedim. Múmkin, anamyzdyń muny menen jasyrǵany durys ta bolǵan shyǵar. Qai ana balasyn jaman jaǵynan kórsetkisi keledi? Bul – bizdiń otbasymyzdyń ishki máselesi, biz ony ózimiz sheshemiz. Maǵan osyny habarlaǵandaryńyz durys boldy», – dep túiindedi Baqqojaev.
