Májilis depýtaty Nartaı Aralbaıuly bilim berý salasyndaǵy áleýmettik pedagogtar men tehnıkalyq qyzmetkerlerdiń jalaqysyna qatysty másele kóterip, Úkimetke naqty usynystar joldady, dep habarlaıdy Dalanews.kz.
Depýtattyń aıtýynsha, áleýmettik pedagogtardyń jalaqysy tym tómen. Olardyń qazirgi aılyǵy 118 myń teńge. Al atqaratyn jumysy úlken júktemeni talap etedi. Máselen, 1500-2000 balaǵa qyzmet kórsetý, qujat jınaý, mektepke jol aksıasyn júzege asyrý, erekshe bilimdi qajet etetin balalarmen jumys, tipti keı jaǵdaılarda úılerdi aralaý sıaqty mindetterdi oryndaýǵa májbúr.
Sársenǵalıev 2023 jyly áleýmettik pedagogtardy V3 sanatynan V2 sanatyna aýystyrý týraly usynys bergenin, biraq Úkimet bul máseleni áli kúnge deıin sheshpegenin aıtty. Onyń esebinshe, bul ózgeris olardyń jalaqysyn 150 myń teńgege deıin kóterýge múmkindik beredi.
“Urpaqqa bilim men tárbıe beretin mamandardyń eńbegin laıyq baǵalaý – qoǵam aldyndaǵy mindetimiz,” – dedi ol.
Sonymen qatar, depýtat bilim berý uıymdarynda jumys isteıtin eden jýýshy, aýla sypyrýshy, aspaz, elektrık, vahter syndy tehnıkalyq qyzmetkerlerdiń de tabysy óte az ekenin aıtty. Resmı derekterge súıensek, olardyń jalaqysy 2024 jyly 71%-ǵa, al 2025 jyly 100%-ǵa ósedi dep josparlanǵan. Alaıda bul ózgeristerdiń ózinde olardyń tabysy eldegi ortasha nemese medıanalyq jalaqy deńgeıine jete almaıdy.
“Bul tek áleýmettik ádiletsizdik qana emes, jumysshy mamandyqtaryna degen nemquraıly kózqaras. Memleket basshysy 2024 jyldy “Jumysshy mamandyqtar jyly” dep jarıalady. Eger olardyń eńbekaqysyn bıyl kótermesek, qashan kóteremiz?” – dep túıindedi Sársenǵalıev.
Osy tusta, depýtat Úkimetke kelesi usynystardy joldady:
1. Áleýmettik pedagogtardy V3 sanatynan V2 sanatyna aýystyrýdy qarastyrý.
2. Tehnıkalyq qyzmetkerlerdiń jalaqysyn eldegi ortasha jalaqy deńgeıine jetkizý.
3. Eńbekaqy tóleý júıesine ózgerister engizip, tehnıkalyq qyzmetkerlerge eńbek demalysyna tólenetin járdemaqy mólsherin arttyrý.
4. Búdjettik mekemelerdegi jalaqy teńsizdigin zerdeleý.
Depýtat bul sharalardy júzege asyrý úshin Úkimettiń 2015 jylǵy №1193 qaýlysyna tıisti ózgerister engizýdi usyndy.
“Bilim berý salasynda eńbek etip júrgen mamandar men tehnıkalyq qyzmetkerlerdiń jaǵdaıyn jaqsartý – qoǵam aldyndaǵy boryshymyz,” – dedi Sársenǵalıev.
