QazUÝ-dyń bıologıa jáne bıotehnologıa fakúltetiniń 1 kýrs doktoranty Damır Núsipov Sıan ǵylym jáne tehnologıalar ýnıversıtetine bir jyldyq ǵylymı taǵylymdamaǵa qabyldandy, - dep habarlaıdy Dalanews.kz.
Budan buryn eki ýnıversıtet arasynda jasalǵan kelesimshart negizinde jas ǵalymnyń jetekshileri bekitildi: QazUÝ-lyq PhD Qýanysh Tastambek jáne Sıan ýnıversıtetiniń profesory Liu Xiangrong.
Aıta keterligi, byltyr Ál-Farabı atyndaǵy Qazaq ulttyq ýnıversıtetiniń Basqarma Tóraǵasy – Rektor Janseıit Túımebaev bastaǵan delegasıa QHR bilim vıse-mınıstriniń shaqyrtýymen arnaıy Qazaqstan men Qytaı ýnıversıtetteriniń halyqaralyq ǵylymı sımpozıýmyna qatysty. Halyqaralyq shara barysynda QazUÝ-dyń eń úzdik 40 ǵylymı-ınnovasıalyq jobasy kórmede tanystyryldy.
Jasalǵan kelisimder nátıjesinde Sıan ǵylym jáne tehnologıalar ýnıversıtetiniń «Kómir bıotransformasıasy» zerthanasynyń meńgerýshisi, profesor Lú Sánjýn hanymnyń shaqyrtýymen QazUÝ-dyń bıologıa jáne bıotehnologıa fakúltetiniń 1-kýrs doktoranty Damır Núsipov óziniń «Kómirdiń bıologıalyq modıfıkasıasy: proses jáne ónimde» atty doktorlyq dısertasıasy aıasynda ǵylymı taǵylymdamadan ótýde. Qazaqstan Respýblıkasynyń jas ǵalymy Sıan ǵylym jáne tehnologıalar ýnıversıtetinde alǵash ret ǵylymı-zertteý jumystaryn júrgizdi.
Sonymen qatar jýyrda D.Núsipov fızıkalyq hımıany damytý maqsatynda Sıan qalasynda «Shensı provınsıasynyń fızıkalyq hımıasyn damytý» boıynsha H konferensıasyna qatysty. Onda fızıkalyq hımıanyń ǵylymnyń basqa salalarymen pánaralyq baılanysyn jáne ıntegrasıasyn nyǵaıtýǵa, ǵylymı tásilderdi keńeıtýge, zertteýlerdiń ınovasıalyq ádisterin engizý máseleleri talqylandy. D.Núsipov konferensıada baıandama jasaǵan alǵashqy qazaqstandyq jáne sheteldik doktorant boldy. Onyń qatysýy qazaqstandyq ǵalymdardyń joǵary daıyndyǵyn jáne olardyń halyqaralyq ǵylymı qaýymdastyqqa belsendi qatysýyn kórsetti.
Qazaqstan-Germanıa-Qytaı seriktestigi negizinde qurylǵan Halyqaralyq qoldanbaly mıkrobıologıa zerthanasy men Sıan ǵylym jáne tehnologıalar ýnıversıtetiniń «Kómir bıotransformasıasy» zerthanasynyń ǵalymdary 2025 jylǵa arnalǵan halyqaralyq joba grantyn utyp aldy. Joba aıasynda QazUÝ jáne Qytaı ǵalymdary birlesken ǵylymı zertteý jumystaryn júrgizip, eki jaqtyń bakalavr, magıstrant jáne doktoranttarynyń taǵylymdamadan ótýin iske asyrady. Halyqaralyq joba aıasynda ǵalymdar Qazaqstan men Qytaıdyń tómengi surypty kómirlerin zerttep, olardyń qorshaǵan orta men ekologıaǵa zıandy áserin azaıtý ne tómendetý joldaryn anyqtaıtyn bolady. Bul jobaǵa D.Núsipov te qatysady. Ol Ál-Farabı atyndaǵy QazUÝ men Qytaıdyń joǵary oqý oryndary arasyndaǵy kelisimder aıasynda eldiń ǵylymı-ınnovasıalyq áleýetin damytýǵa úles qosýdyń biregeı múmkindigine ıe boldy.
