Memlekettik aýdıt memlekettik baǵaly qaǵazdar naryǵynda negizsiz shyǵarylym faktisin anyqtady. Osyǵan baılanysty Qazaqstanda memlekettik baǵaly qaǵazdar shyǵarýdy retteý boıynsha jańa sharalar qabyldandy, dep habarlaıdy Dalanews.kz.
Joǵary aýdıtorlyq palatanyń tapsyrmasy boıynsha memlekettik baǵaly qaǵazdardyń shyǵarylýyn retteýdi jetildirýdiń jańa sharalary qabyldandy. Olar memleket resýrstaryn paıdalaný tıimdiligin arttyrýǵa jáne memleket boryshyn baqylaýdy kúsheıtýge baǵyttalǵan.
"2024 jylǵy jeltoqsanda QR Qarjy mınıstrligi Qazynashylyq komıtetiniń qyzmetine memlekettik aýdıt júrgizildi. Sonyń ishinde 2021-2023 jyldardyń keıbir aılarynda emısıalyq baǵaly qaǵazdar bastapqyda josparlanǵan kólemnen artyq shyǵarylǵany anyqtaldy. Alaıda respýblıkalyq búdjettiń baqylaý shotynda qarajat bolady dep boljanǵan. Bul búdjettiń 124 mlrd teńgeden astam yqtımal shyǵyndaryna ákeldi. Osyǵan baılanysty Joǵary aýdıtorlyq palata Qarjy mınıstrligine memlekettik qazynashylyq mindettemelerdi shyǵarý, ornalastyrý, aınalysqa qosý, qyzmet kórsetý jáne óteý erejesine ózgerister engizýdi tapsyrdy", delingen vedomstvo habarlamasynda.
Basty maqsat – aldaǵy kezeńge arnalǵan búdjet qarajatynyń qaldyqtary boıynsha oń boljam bolǵan jaǵdaıda ishki naryqta memlekettik baǵaly qaǵazdardyń negizsiz shyǵarylýyn boldyrmaý.
Nátıjesinde Qarjy mınıstriniń bıyl 30 mamyrdaǵy buıryǵymen qajetti ózgerister engizildi.
