Keiingi ýaqytta shetelde júrgen qazaqstandyqtardyń áreketi qoǵamnyń qyzý talqysyna túsip, el imidjine keri áser etip jatqany baiqalady. Jaqynda ǵana Arýjan esimdi bloger Qytaida prank jasaimyn dep jurttyń narazylyǵyna ushyrasa, araǵa uzaq ýaqyt salmai, Vetnamda otandasymyzdyń qatysýymen jappai tóbeles oryn aldy. Jýrnalist Artur Nyǵmetov bul jaittarǵa alańdaýshylyq bildirip, elimizdiń halyqaralyq bedeline kóleńke túsip jatqanyn atap ótti, dep habarlaidy Dalanews.kz.
Qytaida prankpen bastalǵan daý
Buǵan deiin Qytaidyń Gýanchjoý qalasynda qazaqstandyq bloger qoǵamdyq orynda shetel azamattaryna prank jasap, qyzý synǵa qalǵan edi. Boijetken metroda beitanys er adamdardyń tizesi men qolynan ustap, olardyń reaktsiiasyn videoǵa túsirgen. Taǵy bir beinejazbada ol seriktesiniń qaltasynan uialy telefondy jasyryn alyp shyǵyp, kezdeisoq ótip bara jatqan adamǵa ustatyp jiberedi. Keiin telefony joǵaldy dep, seriktesine álgi adamdy nusqaidy.
Qazaqstan azamatynyń bul áreketi Qytaida qyzý talqylanyp, áleýmettik jelide narazylyq týdyrǵan. Qytaidaǵy birneshe basylym politsiia boijetkendi baqylaýyna alǵanyn jazǵan. Qazaqstanǵa oralǵan soń, bloger Arýjan jasaǵan isine ókinetinin aityp, kópshilikten keshirim surady.
“Meniń videom bireýdi renjitý maqsatynda túsirilmegen. Bul oilanbai jariialanǵan material boldy. Videom bireýge jaǵymsyz áser etse, keshirim suraimyn. Endi kontentti jariialaý máselesine muqiiat qaraimyn”, — dedi ol Qazaqstanǵa oralyp.
Politsiia boijetkenge profilaktikalyq áńgime júrgizip, kontent jariialaý kezinde muqiiat bolýdy eskertken. Sonymen qatar syrtqa shyqqanda ózge eldiń zańyn saqtaýǵa shaqyrdy.
Vetnamdaǵy tóbeles
Qytaidaǵy oqiǵanyń izi sýymai jatyp, Vetnamda taǵy bir keleńsiz jaǵdai tirkeldi.
Danang qalasyndaǵy kóńil kóterý ornynda qazaqstandyq azamattyń qatysýymen jappai tóbeles boldy. Oqiǵaǵa Vetnam turǵyndarymen qatar ózge elderdiń azamattary da aralasqan. Videodaǵy basty keiipker – Temirlan esimdi azamat bolýy múmkin. Belgili málimetterge qaraǵanda, ol týristik firmanyń iesi.
Videodaǵy qazaqstandyq azamattyń ústinde “Sparta Qazaqstan” qaýymdastyǵynyń logotipi bar aq jeide bolǵany baiqalady. Bul uiym motivatsiialyq treningterden ótken azamattardy biriktiretin qaýymdastyq retinde tanymal.
Oqiǵaǵa qatysty ázirge Vetnam nemese Qazaqstan tarapynan resmi málimdeme jasalǵan joq.
Jýrnalist qandai pikir bildirdi?
Artur Nyǵmetov mundai oǵash áreketter eldiń syrtqy bedeline nuqsan keltirip, diplomattardyń uzaq jyldar boiǵy eńbegin zaia ketirip jatqanyn aitty.
“Árine, bular tek BAQ betine shyǵyp úlgergeni ǵana. Biz bilmeitin, aqparat quraldaryna jetpegen mundai jaǵdailar qanshama? Ókinishke qarai, qazaqstandyqtardyń sheteldegi oǵash áreketi saldarynan kóptegen elder azamattarymyz úshin vizasyz tártipti qaita qarastyryp jatyr. Keibiri vizasyz rejimnen bas tartsa, endi biri elde bolý ýaqytyn qysqartýda”, – deidi jýrnalist.
Nyǵmetov qazaqstandyq týristerdiń bul áreketi diplomattardyń kóp jylǵy eńbegin joqqa shyǵaryp otyrǵanyn atap ótti.
“Diplomatiialyq qyzmet ondaǵan jyldar boiy áreń degende qol jetkizgen kelisimder men reisterdi, jinaǵan abyroi men senimdi osyndai birneshe jaýapsyz adam áp-sátte tas-talqan etýde. Qazaq pasporty, qazaq aty men bedeli osylaisha qunsyzdanyp barady. Shetelde “qazaq” degen sózden úrkitin jaǵdaiǵa jetti. Muny esh ásireleýsiz aityp otyrmyn. Bul – aqiqat. Bul – uiat”, – dep qynjylady jýrnalist.
Artur Nyǵmetov shetelge shyqqan ár qazaq Qazaqstannyń kelbeti ekenin umytpasa deidi.
“Shetelde siz – óz elińizdiń ókilisiz. Qandai áreket etseńiz, tutas el týraly da sondai oi qalyptasady. Óz abyroiymyzdy ózimiz túsirmeiik. Bálkim, osyny túsinetin kez jetken shyǵar”, – dep túiindedi ol.
