Qazaqstanda turǵyn úilerdiń podezderi men baspaldaq alańdaryna arba, velosiped, samokat, tipti eski jihaz qoiýǵa zań júzinde tyiym salynady, dep habarlaidy Dalanews.kz.
Krisha.kz málimetinshe, mundai áreket órt qaýipsizdigi talaptaryn óreskel buzady. Tótenshe jaǵdai kezinde evakýatsiialaý joly ashyq ári bos turýy qajet.
«Jeke zattardy tek arnaiy bólingen oryndarda – ortaq qoimalarda nemese arba qoiatyn bólmelerde saqtaýǵa ruqsat beriledi. Podezdi jeke bas maqsatynda qoldanýǵa zań júzinde tyiym salynǵan. Bul talapqa arba da kiredi. Eger kórshilerińiz velosiped, arba, jihaz, samokat siiaqty jeke múlikterin baspaldaq alańyna qoisa, foto jáne videoǵa túsirip, politsiiaǵa shaǵymdana alasyz. Mundai áreket Ákimshilik quqyq buzýshylyq týraly Kodekstiń 505-babyna sáikes keledi», – deidi zańger Arkadii Rýbtsov.
QR ÁQBtK 505-baby («Aýmaqtardy abattandyrý erejelerin buzý») boiynsha, jeke tulǵalarǵa aldymen eskertý beriledi nemese 20 AEK (shamamen 79 000 teńge) kóleminde aiyppul salynady. Eger zań buzýshylyq bir jyl ishinde qaitalansa, aiyppul mólsheri 30 AEK-ke (118 000 teńgege) ósedi.
Zań buzýshyǵa «eshkimge ziiany joq» degen samokat úshin de, baspaldaqqa tastalǵan eski divan nemese qoqys salynǵan qoraptar úshin de dál osyndai shara qoldanylady.
