Ol boiynsha alǵashqy reis 2026 jyly iske qosylady. Bul joba tranzittik júk aǵyndaryn Qazaqstanǵa qarai burýǵa múmkindik beredi jáne júk aviatasymaly naryǵyndaǵy bizdiń ustanymymyzdy kúsheitedi. Bul týraly búgin Premer-ministr Oljas Bektenov aviatsiia salasyn damytý máseleleri boiynsha ótkizgen jiynda aitty. Onda Prezidenttiń Qazaqstannyń aviatsiialyq hab retindegi rólin kúsheitý, atap aitqanda, áýe toraptaryn damytý, jerústi infraqurylymyn jańǵyrtý jónindegi tapsyrmalaryn júzege asyrý barysy qaraldy. Ulttyq júk aviatasymaldaýshyny qurý máselesine erekshe nazar aýdaryldy, dep habarlaidy Dalanews.kz.
Kólik ministrliginiń málimetinshe, 2025 jyldyń birinshi jartyjyldyǵynda qazaqstandyq aviakompaniialar 7,2 mln jolaýshy tasymaldaǵan, bul ótken jyldyń sáikes kezeńimen salystyrǵanda 6%-ǵa artyq. Áýejailarda jolaýshylarǵa qyzmet kórsetý kólemi 14,4 mln adamǵa deiin artty. Qazirgi ýaqytta ishki aviatasymaldar jalpy jiiligi aptasyna 849 reis bolatyn 61 baǵdar boiynsha oryndalady.
Sońǵy jyldary Qazaqstanda 20 ushý-qoný jolaǵy, 19 terminal rekonstrýktsiialandy, Túrkistanda jańa áýejai salyndy. Kólik ministri Nurlan Saýranbaev biyl áýe kemeleri parkin 16 birlikke tolyqtyrý kútilip otyrǵanyn, onyń 6-ýy búginde satyp alynǵanyn baiandady. Jalpy, 2030 jyldyń sońyna deiin flot 221 birlikke deiin ulǵaitylady. Sondai-aq 2025 jyly 36 baǵdardy ashý jáne jańartý josparlanýda. Investitsiialyq baǵdarlamalar sheńberinde aviatsiia salasyna barlyǵy shamamen 2,9 mlrd dollar tartý kózdelip otyr. Qarajatty iri jobalardy júzege asyrýǵa, atap aitqanda, Katonqaraǵai, Zaisan, Kendirli, sondai-aq Arqalyq týristik aimaqtarynda jańa áýejailar salý, 10 ushý-qoný jolaǵy men 10 terminaldy rekonstrýktsiialaý, arnaiy tehnika parkin jańartý jumystaryna jumsalmaq.
Sondai-aq jiynda júk aviakompaniiasyn qurý jónindegi bastamanyń iske asyrylý barysy qaraldy. Bul joba álemdik júk aviatasymaly naryǵynyń turaqty ósýine bailanysty qolǵa alynǵaly otyr. Búgingi tańda ondaǵy kólem 57,7 mln tonnany quraidy, bul rette tasymaldardyń shamamen 15%-y Qazaqstannyń áýe keńistigi arqyly ótedi. "Samuryq-Qazyna" UÁQ" AQ basqarma tóraǵasy Nurlan Jaqypov álemdik tájiribege sáikes bastapqy kezeńde úsh áýe kemesin jalǵa alyp, keiinnen flotty on birlikke deiin keńeitý kózdelip otyrǵanyn baiandady. Ulttyq júk aviatasymaldaýshynyń operatorlyǵymen alǵashqy reisti iske qosý 2026 jyldyń basyna júzege aspaq. Joba ózin ózi aqtaýy úshin otynmen qamtamasyz etýdiń kepildendirilgen kólemi qarastyrylýda.
Premer-ministr júk aviatasymaldaýshyny qurý boiynsha barlyq daiyndyq protsesterin barynsha jedeldetýdi tapsyrdy.
"Prezident Qasym-Jomart Toqaev Qazaqstandy aimaqtaǵy jetekshi aviatsiialyq hab retinde kúsheitý mindetin qoidy. Qazirgi tańda áýejai infraqurylymyn jáne ishki tasymaldardy damytý boiynsha keshendi jumystar júrgizýde. Sonyń ishinde júk aviatasymaldaýshyny qurý – negizgi jobalardyń biri. Ony júzege asyrý tranzittik júk aǵyndaryn Qazaqstanǵa qarai burýǵa múmkindik beredi jáne júk aviatasymaly naryǵyndaǵy bizdiń ustanymymyzdy kúsheitedi", — dep atap ótti Oljas Bektenov.
