Bala Jambyl atymen elge tanylǵan jas aqyn Jambyl Dúisenov kópshilik aldyna qaita shyǵýǵa nietti ekenin málimdedi. Biraz ýaqyt boiy halyq nazarynan tys qalǵan aqyn aldaǵy ýaqytta shyǵarmashylyǵyn jalǵastyryp, sahna men efirge qaita oralǵysy keletinin aitty, dep habarlaidy dalanews.kz.
Jambyl Dúisenovtiń sózinshe, ol sońǵy ýaqytta AQSh-ta bolǵan. Alaida Amerikaǵa oqýǵa barmaǵanyn jetkizdi. Aqyn shetelge qandai maqsatpen barǵanyn keiinirek áleýmettik jelidegi paraqshasynda túsindiretinin aitty.
"Halqymdy qaitadan qýantqym keledi. Halqymnyń yqylasyna bólengim keledi. Halqymnyń júreginen oryn tapqym keledi. Halyqtyń yqylasyna bólensem, men úshin odan asqan baqyt ta, marapat ta joq. Qaitadan jarq etip shyǵamyn. Halqyma ýáde beremin", – dedi ol jariialaǵan videosynda.
Jas aqyn aldaǵy ýaqytta telearnalarǵa shyǵyp, jańa óleńderin kópshilikke usynýdy josparlap otyr. Ol shyǵarmashylyǵyn damytyp, qaitadan el aldyna shyǵýǵa daiyn ekenin jetkizdi.
Osyǵan bailanysty Qazaqstannyń halyq ártisi Maqpal Júnisova da Instagram paraqshasynda pikir bildirip, aqynǵa qoldaý kórsetti.
"Bala Jambyl, aqyn Jambyl dep halyqty súisintken edi. Endi úlken jigit bolyp, basynan ótken qiynshylyqty jeńip, halyqqa jańa óleńderin jariia etýine tilektespin", – dep jazdy ánshi.
Aita keteiik, Bala Jambyl atymen tanylǵan Jambyl Dúisenov 4 jasynan bastap óleń jazyp, 7 jasynan jyr keshterin ótkizip, kópshilikti tańǵaldyrǵan edi. Kezinde oǵan belgili aqyn Muhtar Shahanov ta batasyn bergen.
