2027 jylǵy respýblikalyq biýdjetten óńirlerdegi infraqurylymdy jańartýǵa qosymsha 47 mlrd teńge qarastyryldy. Quryltai depýtattarynyń bastamasymen bólingen qarajat 52 jobany júzege asyrýǵa baǵyttalady, dep habarlaidy dalanews.kz.
Qosymsha qarjynyń basym bóligi – 28,1 mlrd teńge jylý, elektr jáne gaz júielerin damytýǵa jumsalady. Onyń aiasynda birqatar eldi mekende injenerlik jeliler salynyp, tozyǵy jetken nysandar jańǵyrtylady.
Aqmola oblysynyń Qorǵaljyn aýdanynda jylý jelilerin salý, Kókshetaýda aýyzsý júiesi men káriz kollektoryn júrgizý, al Atbasarda ortalyq qazandyqty qaita jańartý josparlanǵan.
Almaty oblysynyń Eńbekshiqazaq aýdanynda gaz qubyry men taratý jelileri tartylady. Jambyl oblysynyń Talas aýdanynda gaz júiesi salynyp, Taraz qalasynda jańa qosalqy stantsiia boi kótermek.
Qaraǵandy oblysyndaǵy Aqsý-Aiýly, Erkindik, Óspen jáne Sáken Seifýllin aýyldaryn gazben qamtý kózdelip otyr. Sondai-aq Abai aýdanyndaǵy magistraldyq jylý jelisiniń bir bóligi qaita jańartylady.
Qostanai oblysynyń Qamysty aýdanynda gaz taratý jelileri salynyp, Arqalyq pen Lisakovsk qalalaryndaǵy magistraldyq jylý júieleri jóndeledi. Qyzylorda oblysynda Sýnaqata, Eńbek, Ekpindi, Qojaberdi jáne Súttiqudyq aýyldaryna gaz jetkizý josparlanǵan.
Mańǵystaý oblysynyń Aqtaý qalasynda qazandyq salynady. Semeidegi eki mekteptiń ortalyq jylý pýnktteri men jylý jelileri qaita jańǵyrtylyp, qýat transformatorlary aýystyrylady. Sonymen qatar «Qýanysh» balabaqshasynan Máńgilik El kóshesine deiingi jylý júiesin jóndeý qarastyrylǵan.
Soltústik Qazaqstan oblysynyń Novoishimskoe aýylynda magistraldyq jylýmen jabdyqtaý jelileri salynady. Ýálihanov jáne Aqjar aýdandarynda joǵary kerneýli saqinaly elektr jelisi júrgiziledi. Óskemendegi qazandyq pen Tekeli qalasyndaǵy jylý jelileri de jańartylady. Ulytaý oblysynda gaz qubyry men Atasý avtomattandyrylǵan gaz taratý stantsiiasyn salý josparlanǵan.
Budan bólek, Atyraý oblysynda eldi mekenderdi tasqynnan qorǵaýǵa 2,5 mlrd teńge bólinedi. Bul qarajat Alǵa aýylyndaǵy, sondai-aq Mahambet aýdanyndaǵy Mahambet, Beibarys jáne Taldykól eldi mekenderiniń mańynda Jaiyq ózeniniń jaǵasyn bekitýge jumsalmaq.
Qostanai, Túrkistan jáne Ulytaý oblystaryndaǵy sýmen jabdyqtaý júielerin damytýǵa 4,9 mlrd teńge qarastyrylǵan.
Sondai-aq Pavlodar áýejaiynyń terminaly men basqa da nysandaryn qaita jańartý jáne Shymkentte bir aýysymda 500 adam qabyldaityn qalalyq emhana salý úshin 2,5 mlrd teńge baǵyttalady. Aqtóbe, Jetisý jáne Batys Qazaqstan oblystaryndaǵy jobalardy qoldaýǵa taǵy 6,5 mlrd teńge bólinbek.