Sátbaev ýniversiteti men CityUHK birlesken magistratýrasynyń alǵashqy túlekteri qos diplom alyp shyqty

Sátbaev ýniversiteti men CityUHK birlesken magistratýrasynyń alǵashqy túlekteri qos diplom alyp shyqty

Sátbaev ýniversiteti men Gonkong qalalyq ýniversitetiniń (CityUHK) birlesken magistrlik baǵdarlamasynyń alǵashqy bes túlegi eki ýniversitettiń de diplomyn alyp shyqty. Diplom 18 qarasha kúni Astana qalasynda ótken QR Ǵylym jáne joǵary bilim ministrliginiń Strategiialyq áriptester forýmynda saltanatty túrde tabys etildi. Jiynǵa QR Ǵylym jáne joǵary bilim ministri Saiasat Nurbek qatysty, dep habarlaidy dalanews.kz.

Bul eki ýniversitet 2024 jyly iske qosqan birlesken magistrlik baǵdarlamanyń alǵashqy túlekteri. Eki jyldyq oqý merziminde bes stýdent eki joǵary oqý ornynyń bilim berý baǵdarlamalaryn meńgerip shyqty. Olardyń bireýi jasandy intellekt baǵyty boiynsha, al tórteýi qurylys injeneriiasy salasy boiynsha magistr dárejesin ielendi.

«Bizdiń túlekter Qazaqstanda suranysqa ie bolyp otyrǵan salalar boiynsha zamanaýi bilim alyp, halyqaralyq tájiribe jinaqtap shyqty. Bul bilim men daǵdylar olardyń kásibi múmkindikterin keńeitip, kúrdeli injenerlik jáne tehnologiialyq mindetterdi sheshýge berik negiz qalaidy», – dep atap ótti Sátbaev ýniversitetiniń Basqarma tóraǵasy – rektory Meiram Begentaev.

Sátbaev ýniversiteti men CityUHK arasyndaǵy yntymaqtastyq qarym-qatynas 2024 jyly bastaldy. Qazirgi ýaqytta eki ýniversitet bakalavriat pen magistratýra boiynsha birlesken bilim berý baǵdarlamalaryn júzege asyrýda. Bakalavriat stýdentteri kompiýterlik ǵylymdar, qurylys injeneriiasy jáne materialtaný baǵyttary boiynsha 2+2 shemasymen bilim alady. Al magistrlik baǵdarlamalar mashinalyq oqytý jáne derekterdi taldaý, qurylys jáne materialtaný salalaryn qamtidy.

Búginde birlesken bilim berý baǵdarlamalary boiynsha 87 stýdent bilim alyp júr. Sonymen qatar eki ýniversitet jańa baǵdarlamalar ashyp, Qazaqstanda CityUHK ortalyǵyn (CIRI) qurý baǵytynda jumys júrgizýde. Bul ortalyq birlesken ǵylymi zertteýler men akademiialyq yntymaqtastyq qarym-qatynasty damytýǵa yqpal etetin bolady.

Gonkong qalalyq ýniversiteti (CityUHK) álemdegi jetekshi zertteý ýniversitetteriniń qataryna kiredi. QS World University Rankings 2027 reitingi boiynsha ol 52-orynǵa, al Times Higher Education World University Rankings 2027 reitinginde 70-orynǵa ie boldy. 2026 jylǵy qarasha aiynda ýniversitet QS-tiń Aziia reitinginde 4-orynǵa kóterildi.

Times Higher Education uiymy CityUHK-ti 2024–2026 jyldar aralyǵynda úsh jyl qatarynan álemdegi eń halyqaralyq ýniversitet dep tanydy. Munda shamamen 100 elden kelgen stýdentter bilim alady. Ǵylymi jariialanymdardan dáieksóz keltirý kórsetkishi boiynsha bir oqytýshyǵa shaqqanda CityUHK Garvard ýniversitetinen keiin álemde ekinshi orynda, al Aziiada birinshi orynda tur.