Aqtóbede joǵary oqý oryndarynyń birinde ekinshi kýrsta oqityn stýdent alaiaqtardyń arbaýyna túsip, depozitindegi 10 million teńgesinen aiyryldy. Boijetken bul qarajatty oqý aqysyn tóleý úshin uzaq ýaqyt boiy jinaǵan, dep habarlaidy dalanews.kz.
"Diapazon" basylymynyń málimetinshe, alaiaqtyq áreket WhatsApp arqyly jasalǵan qońyraýdan bastalǵan.
Aldymen beitanys adam ózin bailanys operatorynyń qyzmetkeri retinde tanystyryp, stýdentke SIM-kartasynyń qoldanylý merzimin uzartý qajet ekenin aitqan. Ol qyzdyń senimine kirgennen keiin áńgimege ózin bank qyzmetkerimin dep tanystyrǵan ekinshi adam aralasqan.
Jalǵan bank mamany stýdenttiń atyna bógde adamdar nesie rásimdeýge áreket jasap jatqanyn aityp, ony asyqtyrǵan. Qarajatty saqtap qalýdyń jalǵyz joly – aqshany "qaýipsiz shotqa" aýdarý dep sendirgen.
Qoryqqan stýdent alaiaqtardyń nusqaýyn oryndap, depozitindegi shamamen 10 million teńgeni kórsetilgen shotqa jibergen. Biraz ýaqyttan keiin ǵana ol aldanǵanyn túsinip, politsiiaǵa júgingen.
Aqtóbe oblysynyń politsiia departamenti bank pen bailanys operatorynyń qyzmetkerleri azamattardan aqshany "qaýipsiz shotqa" aýdarýdy eshqashan talap etpeitinin eskertti. Quqyq qorǵaý organdary beitanys adamdardyń nusqaýymen qandai da bir qarjylai operatsiia jasamaýǵa jáne qysym kórsetilgen jaǵdaida telefon tutqasyn birden qoiýǵa keńes berdi.