Elimizde balabaqshaǵa, mektepke jáne sport sektsiialaryna balalardy turaqty jetkizetin kólikterdi arnaiy tizilimge engizý usynyldy. Mundai bastamany Quryltaida "Ádilet" partiiasy fraktsiiasynyń depýtaty Aijan Naimbekova kóterdi, dep habarlaidy dalanews.kz.
Depýtat premer-ministrdiń orynbasary – kólik ministrine, sondai-aq ishki ister jáne oqý-aǵartý ministrlerine joldaǵan saýalynda balalar tasymalyna qoiylatyn qaýipsizdik talaptaryn qaita qaraý qajettigin aitty.
Onyń keltirgen deregine sáikes, 2025 jyly jol-kólik oqiǵalarynan 285 bala qaza taýyp, 12 409 bala túrli jaraqat alǵan. Al 2026 jyldyń basynan beri jol apatynan kóz jumǵan balalar sany 200-den asqan.
"285 bala – jai ǵana statistika emes. Ár sannyń artynda perzentinen aiyrylǵan otbasynyń qaiǵysy tur", – dedi depýtat.
Ol balalar tasymaly kezindegi qaiǵyly oqiǵalardy da mysalǵa keltirdi. 2023 jylǵy qazanda Túrkistan qalasynda jeke balabaqshanyń júrgizýshisi bes jastaǵy balany úiiniń mańyna túsirgennen keiin baiqamai kólikpen qaǵyp ketken. Búldirshin oqiǵa ornynda kóz jumǵan.
2024 jylǵy tamyzda Aqtóbe oblysynda jarysqa bara jatqan bes bala jol apatynan qaza tapty. Al 2026 jylǵy sáýirde Túrkistan oblysynda bolǵan kólik apaty taǵy úsh balanyń ómirin qiǵan. Depýtattyń aitýynsha, eki jaǵdaida da sapar jóninde quzyrly organdarǵa aldyn ala habar berilmegen.
"2026 jyly politsiia úsh myńnan astam mektep avtobýsyn tekserdi. Sonyń shamamen 400-inen tehnikalyq aqaý anyqtalǵan. Buǵan qosa, qarasha aiynyń basynda Túrkistan oblysyndaǵy jekemenshik balabaqshanyń 12 oryndyq kóligine 30-dan astam bala mingizilgeni týraly aqparat tarady. Eger bul derek rastalsa, balalardyń ómiri men densaýlyǵyna tikelei qaýip tóngenin kórsetedi", – dedi Aijan Naimbekova.
Osyǵan bailanysty depýtat balany kólikke otyrǵyzý, túsirý jáne ata-anasyna tapsyrý tártibin zańnamalyq deńgeide bekitýdi usyndy. Sondai-aq balalardy turaqty tasymaldaityn kólikterdiń barlyǵyn biryńǵai tizilimge engizip, árbir jol apatyn bólek esepke alý men taldaý júiesin qurý qajet dep sanaidy.
Bul talaptar memlekettik tapsyrys boiynsha jumys isteitin jekemenshik balabaqshalar men ózge de uiymdarǵa da ortaq bolýy kerek.
"Júrgizýshiler men balalardy alyp júrýge jaýapty adamdardyń mindetteri men jaýapkershiligin zańda naqty belgileý qajet. Sonymen birge memlekettik baqylaýdy kúsheitip, ministrlikterdiń ózara is-qimyly men aqparat almasý tártibin bekitý kerek", – dedi depýtat.
Onyń sózinshe, usynystyń maqsaty – uiymdarǵa qosymsha talap júkteý emes, balalardyń ómirin qorǵaý.
"Ár balanyń ómiri qymbat. Onyń qaýipsizdigi uiymnyń memlekettik nemese jekemenshik ekenine, tasymaldyń aqyly ne tegin júrgiziletinine bailanysty bolmaýǵa tiis", – dedi Aijan Naimbekova.