Májilis depýtaty Oljas Nuraldinov ózin-ózi jumyspen qamtyǵan azamattardyń ai saiynǵy tabys shegin jyldyq kórsetkishpen esepteýdi usyndy. Ol Salyq kodeksine ózgeris engizip, aiyna 300 AEK bolatyn shekti jylyna 3 600 AEK-ke aýystyrý qajet dep sanaidy, dep habarlaidy dalanews.kz.
Depýtattyń aitýynsha, qoldanystaǵy talap týrizm, qurylys, jóndeý, tasymal jáne abattandyrý siiaqty maýsymdyq jumystarmen ainalysatyn azamattarǵa qolaisyz. Sebebi mundai salalarda tabys jyldyń belgili bir kezeńinde ǵana túsedi. Al qalǵan ýaqytta tapsyrys az bolýy múmkin.
«Qazir suranys joǵary kezde azamattar arnaiy salyq rejiminen aiyrylyp qalmaý úshin tabysyn shekteýge májbúr. Mysaly, bir adam ai saiyn 500 myń teńge tabys tapsa, ekinshisi tórt ai boiy aiyna 1,5 million teńgeden tabys tabady. Ekeýiniń de jyldyq tabysy 6 million teńge bolady. Biraq ekinshi azamat ailyq limitten asyp ketkendikten, arnaiy salyq rejimin qoldaný quqyǵynan aiyrylady», – dedi Nuraldinov.
Depýtattyń usynysy boiynsha, ai saiynǵy tabysqa shekteý qoimai, jyldyq tabysty esepke alý kerek. Bul azamattarǵa maýsym kezinde kóbirek jumys istep, jyldyq tabys mólsherinen aspaityn jaǵdaida salyqtyq jeńildikterdi saqtaýǵa múmkindik beredi.
Sonymen qatar, depýtat tsifrlyq platformalar arqyly jumys isteitin azamattardyń tabysyn esepteý tártibin de ózgertýdi usyndy.
Onyń aitýynsha, búginde kóptegen azamat qyzmetin tsifrlyq platformalar arqyly kórsetedi. Mysaly, «Iandeks Go» kei jaǵdaida tapsyrys qunynyń 23 paiyzyna deiin komissiia ustaidy. Bul aqsha júrgizýshige nemese kýrerge tólenbeidi, platformanyń ózinde qalady.
«Azamattyń qolyna túspegen aqshany onyń tabysy dep esepteý qanshalyqty durys? Bizdiń usynysymyz – platformanyń komissiiasy shegerilgennen keiin azamattyń qolynda qalǵan aqsha ǵana onyń tabysy retinde eseptelýi kerek», – dedi depýtat.
Onyń pikirinshe, mundai ózgerister ózin-ózi jumyspen qamtyǵan azamattardyń salyq tóleý tártibin ádil etip, maýsymdyq jumys isteitinder men tsifrlyq platformalar arqyly qyzmet kórsetetin adamdarǵa qolaily jaǵdai jasaýǵa múmkindik beredi.