Mańǵystaý oblysynyń Tótenshe jaǵdailar departamenti konkýrs ótkizbei, tikelei kelisimshart arqyly bes Toyota Hilux avtokóligin satyp alýdy josparlaǵany týraly aqparat tarady. Kólikterdiń jalpy quny 155 mln teńge dep kórsetilgen, dep habarlaidy dalanews.kz.
Memlekettik satyp alý salasyn baqylaityn Telegram-arnadaǵy málimetke sáikes, satyp alýdy osyndai tásilmen júrgizýge negiz retinde Aqtaý qalasy ákiminiń 2023 jylǵy 7 maýsymdaǵy qaýlysy usynylǵan.

Qujatta Kaspii teńizi deńgeiiniń tómendeýi saldarynan MAEK kásipornyna sý jetkizý kólemi azaiyp, onyń jumysy toqtap qalýy múmkin ekeni aitylǵan. Bul jaǵdai Aqtaý turǵyndaryn aýyzsýmen úzdiksiz qamtamasyz etýge qaýip tóndirgen. Osyǵan bailanysty qala aýmaǵynda tabiǵi sipattaǵy tótenshe jaǵdai jariialanǵan.
Alaida jariialanǵan málimette 2023 jyly qabyldanǵan qaýlynyń bes jol talǵamaityn kólikti satyp alýǵa qandai qatysy bary naqty túsindirilmegen. Telegram-arna avtorlary satyp alýdy negizdeitin qujattar qatarynda tek osy qaýly kórsetilgenin málimdedi.
Dalanews.kz máseleniń mán-jaiyn anyqtaý úshin Mańǵystaý oblysynyń Tótenshe jaǵdailar departamentine resmi saýal joldady.