Qazaqstan Kaspii teńiziniń ekojúiesin saqtaý jáne onyń deńgeiin tómendetýge qarsy is-qimyl maqsatynda halyqaralyq jáne óńirlik yntymaqtastyqty nyǵaitýǵa beiildiligin rastady, dep habarlaidy dalanews.kz.
Halyqaralyq kezdesýde sóz sóilegen qazaqstandyq tarap ortasha jyldyq temperatýranyń ósý qarqyny álemdik ortasha kórsetkishterden 2,5 ese asatyn Kaspii óńirindegi klimattyq ózgeristerdiń údeýine alańdaýshylyq bildirdi.
Kaspiidiń soltústik-shyǵys jaǵalaýy, jaǵalaýdaǵy qaýymdastyqtardyń ál-aýqaty jáne aimaqtyń turaqty damýy úshin taiazdyqtyń áserine erekshe nazar aýdaryldy. Qazaqstan Kaspii teńiziniń deńgeiin tómendetý máselesi boiynsha Úkimetaralyq komissiia qurýdy, sondai-aq Qazaqstan Respýblikasynyń Prezidenti Qasym-Jomart Toqaev usynǵan Kaspii sý resýrstaryn saqtaý jónindegi memleketaralyq baǵdarlamany ilgeriletýdi qosa alǵanda, Kaspii mańy memleketteriniń bastamalaryn quptady.
Ári qaraiǵy jumystyń basym baǵyttary retinde Qazaqstan Kaspii teńizi deńgeiiniń aýytqýy boiynsha 2026-2036 jyldarǵa arnalǵan is-qimyl josparyn ázirleýdi, birlesken monitoring pen boljaý júielerin nyǵaitýdy, sondai-aq jaǵalaý aýmaqtaryn beiimdeý sharalaryn ázirleýdi qosa alǵanda, saiasi ýaǵdalastyqtardan birlesken sharalardy praktikalyq iske asyrýǵa kóshýdi belgiledi.
Qazaqstan COP31-ge usynǵan Kaspii óńiri úshin basym ekologiialyq jáne beiimdeý jobalaryn iske asyrýǵa járdemdesýge arnalǵan óńirlik investitsiialyq baǵdarlama jeke atap ótildi. Qazaqstan sondai-aq halyqaralyq uiymdardy, qarjy institýttaryn jáne damý boiynsha seriktesterdi tartý úshin «Kaspii teńiziniń dostary» platformasyn odan ári damytýdy jaqtady.
Kaspii teńizin saqtaýda naqty jáne ólshenetin nátijelerge qol jetkizý úshin qoldanystaǵy óńirlik tetikter, eń aldymen Tegeran konventsiiasy negizinde bes Kaspii mańy memleketteriniń kúsh-jigerin shoǵyrlandyrý qajettigi atap ótildi.