Oqýshyny qaǵyp, izin sýytqan: Qaraǵandy oblysynda qaiǵyly jol apaty boldy

Oqýshyny qaǵyp, izin sýytqan: Qaraǵandy oblysynda qaiǵyly jol apaty boldy
Foto: Kriminalnyi Kazahstan

17 qazan kúni keshki ýaqytta Qaraǵandy oblysynyń Petrovka kentinde 14 jastaǵy oqýshy qyzdy kólik qaǵyp ketti. Jasóspirim alǵan jaraqatynan oqiǵa ornynda kóz jumdy, dep habarlaidy dalanews.kz.

Kriminalnyi Kazahstan derekkóziniń málimetinshe, jol apatynan keiin júrgizýshi toqtamai, oqiǵa ornynan ketip qalǵan. Muny kórgen er adam kóliktiń sońynan qýyp jetip, memlekettik nómirin jazyp alǵan jáne aqparatty politsiiaǵa jetkizgen. Biraz ýaqyttan soń kólik iesi jol apaty bolǵan jerge qaita oralǵan.

Áiel óziniń qashyp ketýge áreket jasamaǵanyn aitady. Onyń sózinshe, kólik salonynda úsh jastaǵy nemeresi bolǵan. Apattan keiin bala qatty shoshyp, jylai bastaǵandyqtan, júrgizýshi oqiǵa ornynan ýaqytsha ketip, shamamen jarty saǵattan keiin qaityp kelgen. Sondai-aq áiel saǵatyna 50 shaqyrym jyldamdyqpen júrgenin, al qyzdyń joldy belgilenbegen jerden kesip ótkenin málimdegen.

Politsiia jol qozǵalysy erejesin buzý saldarynan adam ólimine ákep soqqan jol-kólik oqiǵasy jáne apat ornyn tastap ketý derekteri boiynsha qylmystyq ister qozǵady. Avtokólik aiyp turaǵyna qoiyldy.

Qazir kóliktiń naqty jyldamdyǵyn jáne júrgizýshiniń soqtyǵystyń aldyn alýǵa múmkindigi bolǵan-bolmaǵanyn anyqtaý úshin birqatar saraptama taǵaiyndalǵan. Túpkilikti protsessýaldyq sheshim saraptama qorytyndysynan keiin qabyldanady.

Marqumnyń týystary júrgizýshiniń zań aiasynda jaýapqa tartylýyn talap etip otyr.