Áleýmettik jelide Batyr Seikenov esimdi azamat ózine qarsy aqparattyq shabýyl júrip jatqanyn málimdedi. Onyń aitýynsha, buǵan Qostanai oblystyq ańshylar men balyqshylar qoǵamynyń tóraǵasy qyzmetine úmitker bolýy sebep bolýy múmkin, dep habarlaidy dalanews.kz.
Seikenov keiingi kezde áleýmettik jelilerde buryn jariialanǵan videolary qaita taratylyp, sózderi burmalanyp jatqanyn aitty. Sondai-aq keibir blogerler onyń beinesin ruqsatsyz paidalanyp, montajdalǵan rolikter jariialaǵanyn jetkizdi.
"Qazir barlyq áleýmettik jelide maǵan qarsy joiqyn shabýyl júrip jatyr. Olar meniń Kia Saianǵa jaýap bergen eski videolarymdy qaita jariialady. Keiin Qostanaidaǵy bir bloger meniń kelisimimsiz beinemdi paidalanyp, video qurastyra bastady. Osylaisha meni qaralaýǵa tyrysyp jatyr", – dedi ol.
Batyr Seikenov ózin Amangeldi Imanovtyń urpaǵy ekenin aityp, ustanymynan bas tartpaitynyn málimdedi.
"Meniń atam Amangeldi Imanov patsha biligine qarsy kúresip, Qazaqstan táýelsizdiginiń bastaýynda turdy. Meniń boiymda onyń qany bar. Sondyqtan óz jolymnan taimaimyn. Qazaqstan – ultyna, dinine jáne túr-túsine qaramastan, osynda turatyn barsha azamattyń ortaq eli. Al memlekettiń turaqtylyǵyna nuqsan keltirýge tyrysqandar jaýap beredi", – dedi Seikenov.
Ol áleýmettik jelidegi qarsylyqty Qostanai oblystyq ańshylar men balyqshylar qoǵamyn basqarýǵa niet bildirýimen bailanystyrdy.
"Qostanai oblysynda ańshylar men balyqshylar qoǵamynyń tóraǵasy bolýǵa sheshim qabyldaǵannan keiin osynyń bári bastaldy. Qazaqqa qoǵam tóraǵasy bolýǵa bolmai ma? Men bul qyzmetke kelemin jáne qoǵamdy basqaramyn", – dedi ol.
Seikenov tóraǵa bolǵan jaǵdaida qarapaiym ańshylarǵa qoljetimdi joldamalar berýge, brakonerlikpen kúresýge jáne et óńdeý tsehtaryna jetkiziletin jabaiy ań eti týraly aqparattardy tekserýge kúsh salatynyn aitty.
"Keibir adamdardyń óz maly bolmasa da, tushpara, shujyq jáne ózge de ónimder shyǵaratyn et tsehtary bar. Bul ónimderge jabaiy ań eti paidalanylýy múmkin. Mundai derekterdiń barlyǵyn tekserýge qol jetkizemin", – dep málimdedi Batyr Seikenov.
Ázirge videoda aitylǵan aiyptaýlarǵa qatysty ekinshi taraptyń pikiri jariialanǵan joq.