Almaty oblysynda politsiia qyzmetkeri Aslan Álserovti óltirdi degen kúdikke ilingen kámeletke tolmaǵandarǵa qatysty bultartpaý sharasy tańdaldy. Sot sheshimimen olar úiqamaqta bolady, dep habarlaidy dalanews.kz.
Jasóspirimderge qatysty Kegen aýdandyq sotynyń sheshimi týraly olardyń advokattary Gaýhar Saryeva men Dinara Shamshekova málimdedi.
Qorǵaýshylardyń aitýynsha, tergeý sýdiasy kámeletke tolmaǵandardy tergeý izoliatoryna qamaýdan bas tartyp, olarǵa úiqamaq túrindegi bultartpaý sharasyn tańdaǵan. Jaqyn arada olarǵa elektrondy bilezik taǵylyp, beinebaqylaý júiesi ornatylýy tiis.
"Sot otyrysynda qorǵaý tarapy tergeý aiasynan tys qalmaýy kerek birqatar mán-jaiǵa da nazar aýdartty. Balalar uzaq jyldar boiy júieli zorlyq-zombylyq pen qatygez qarym-qatynas jaǵdaiynda ómir súrgen bolýy múmkin ekenin joqqa shyǵarýǵa bolmaidy. Olar bolǵan oqiǵalardyń kýágeri ǵana emes, ózderi de soǵan ushyraǵan bolýy yqtimal. Biz muny dáleldengen fakt retinde aityp otyrǵan joqpyz, sondyqtan bul materialdar tergeý barysynda muqiiat tekserilýi kerek", – dedi advokattar.
37 jastaǵy politsiianyń aǵa jedel ýákili Aslan Álserovtiń órtengen denesi 23 maýsymda Almaty oblysy Kegen aýdanynan tabyldy.
Ony óltirdi degen kúdikpen marqumnyń jubaiy, uly jáne taǵy bir jasóspirim ustalǵan bolatyn.
