Almaty qalasynda ataýsyz kóshelerge jańa ataýlar berý jumystary jalǵasýda. Qalalyq máslihattyń Qoǵamdyq damý, mádeniet, sport, din jáne jastar isi jónindegi komissiiasynyń otyrysynda qala boiynsha 156 kóshege ataý berý máselesi qaraldy,- dep habarlaidy Dalanews.kz
Otyrysta Almaty qalasy máslihatynyń tóraǵasy Meiirjan Otynshiev, máslihat depýtattary men qala ákimdigine qarasty tilderdi damytý jáne onomastika bóliminiń basshysy Baqyt Qalymbet qatysty.
Málimetke sáikes, jańa ataý beriletin kóshelerdiń sany aýdandyq bóliniste bylaisha kórsetilgen:
-
Alataý aýdanynda – 10 kóshe;
-
Áýezov aýdanynda – 4 kóshe;
-
Bostandyq aýdanynda – 45 kóshe;
-
Jetisý aýdanynda – 4 kóshe;
-
Medeý aýdanynda – 7 kóshe;
-
Naýryzbai aýdanynda – 86 kóshe.
Usynylǵan ataýlar arasynda elge belgili tulǵalar esimderi bar. Máselen, Bostandyq aýdanynyń «Arhat» shaǵyn aýdanyndaǵy kóshelerdiń birine Olimpiada oiyndarynyń qola júldegeri, mánerlep syrǵanaýshy Denis Tenniń, Alataý aýdanyndaǵy kóshelerdiń birine abaitanýshy ǵalym Qaiym Muhamedhanovtyń, sondai-aq vetnamdyq revoliýtsioner Ho Shi Minniń esimi berilýi usynylǵan.
Sondai-aq, Jetisý aýdanyndaǵy bir kóshege Uly Otan soǵysynyń ardageri Sháńgerei Jánibekovtiń, al basqa kóshelerge túrkitanýshy Abdýali Qaidarovtyń, álemdegi alǵashqy balalar mýzykalyq teatrynyń negizin qalaýshy Natalia Satstyń esimderi beriledi dep josparlanyp otyr.
Budan bólek, birneshe kóshege poetikalyq ári qazaqy reńki bar ataýlar usynyldy. Olardyń qatarynda:
-
Munara,
-
Sarqyrama,
-
Qulyn,
-
Abyz,
-
Suńqar,
-
Qudiret syndy ataýlar bar.
Usynystar máslihattyń sessiiasynda qaralǵan soń, bekitilip, resmi túrde qabyldanbaq. Qala ákimdigi bul bastamanyń tarihi jadymyzdy jańǵyrtyp, ulttyq rýhty dáripteýge baǵyttalǵan mańyzdy qadam ekenin atap ótti.
