Kórnekti ǵalym, geografiia ǵylymdarynyń doktory, professor, Qazaqstan Respýblikasy Ulttyq ǵylym akademiiasynyń akademigi, Memlekettik syilyqtyń laýreaty, Qazaqstannyń eńbek sińirgen qairatkeri Áliia Sársenqyzy Beisenova dúnieden ótti, dep habarlaidy dalanews.kz.
Áliia Beisenova otandyq geografiia jáne ekologiia ǵylymdarynyń damýyna zor úles qosqan belgili ǵalym, ulaǵatty ustaz ári parasatty tulǵa edi. Ol uzaq jyldyq ǵylymi-pedagogikalyq qyzmetinde ulttyq ǵylymnyń órkendeýine eńbek sińirip, kóptegen shákirt tárbieledi. Sondai-aq irgeli ǵylymi eńbekter jazyp, bilim salasynda ózindik qoltańbasyn qaldyrdy.
Áliia Sársenqyzy qazaq ádebiettaný ǵylymynyń kórnekti ókili, Qazaqstan Respýblikasy Ulttyq ǵylym akademiiasynyń akademigi Serik Qirabaevtyń ómirlik jary, senimdi serigi boldy. Ǵylym men bilimge ǵumyryn arnaǵan bul áýlettiń ónegeli joly keiingi urpaqqa úlgi bolyp qala bermek.
Áliia Beisenova M.O. Áýezov atyndaǵy Ádebiet jáne óner institýtynyń ujymyna erekshe yqylaspen qarap, mekemeniń ár jetistigine qýanyp, únemi qoldaý bildirip júrgen jan edi. Marqumnyń meiirimdi bolmysy, parasatty kelbeti men qamqorlyǵy institýt qyzmetkerleriniń jadynda saqtalady.
Osy aýyr qazaǵa bailanysty M.O. Áýezov atyndaǵy Ádebiet jáne óner institýtynyń ujymy jáne institýt direktory Kenjehan Matyjanov Qirabaevtar áýletine, týǵan-týystary men jaqyndaryna, shákirtterine qaiǵyra kóńil aitty.
