Jambyl oblysynda burynǵy memlekettik kásiporynnyń tóraǵasy men birneshe qyzmetkeri aýyl sharýashylyǵyna bólingen 373 million teńge sýbsidiiany jymqyrdy degen aiyppen sottaldy. Bul týraly oblystyq sottardyń birikken baspasóz qyzmeti málimdedi, dep habarlaidy Dalanews.kz.
Qylmystyq isti Merki aýdandyq soty qaraǵan. Prokýratýra bul istiń negizgi figýranttaryn 2023 jyldyń aqpanynda jariia etken. Olar kvazimemlekettik TOO-nyń burynǵy basqarma tóraǵasy men onyń orynbasary. Aita keterligi, sol kezde keltirilgen shyǵyn somasy budan áldeqaida az kórsetilgen edi.
"Sottalýshylar TOO-ny basqara júrip, qyzmet babyn paidalanyp, ózderiniń materialdyq jaǵdaiyn jaqsartý maqsatynda alaiaqtyq jolmen biýdjet qarjysyn naqtyraq aitqanda, ósimdik sharýashylyǵy salasynda ónim kólemi men sapasyn arttyrýǵa arnalǵan sýbsidiiany jymqyrǵan", — delingen resmi habarlamada.
Tergeý materialdaryna sáikes, kásiporyn basshysy men onyń orynbasary alma aǵashynyń kóshetterin satyp alýǵa qatysty kelisimsharttar jasaǵan. Alaida olardyń tapsyrmasymen qaramaǵyndaǵy qyzmetkerler kelisimsharttardyń alǵashqy betterin aýystyryp, satyp alynatyn kóshetterdiń sanyn birneshe ese kóbeitip kórsetken.
Sotta TOO basshylyǵy óz kinásin jartylai moiyndaǵanymen, keltirilgen shyǵyn somasymen kelispeitinin, kórsetilgen soma tym joǵary dep esepteitinin aitqan. Olar bas bostandyǵynan aiyrmaityn jaza suraǵan. Al bes qyzmetker kináni tolyq moiyndaǵan.
Nátijesinde burynǵy basshy jeti jylǵa, al onyń orynbasary alty jylǵa bas bostandyǵynan aiyryldy. Qalǵan qyzmetkerlerge úsh jyldan bes jylǵa deiin bostandyǵyn shekteý jazasy taǵaiyndaldy.
Qazirgi tańda sot úkimi zańdy kúshine engen joq.
