Qazaqstannyń Tsifrlyq damý, innovatsiialar jáne aeroǵarysh ónerkásibi ministrligine qarasty Jasandy intellekt jáne innovatsiialardy damytý komiteti tóraǵasynyń orynbasary Álibek Sailanbaev meditsina salasynda jasandy intellekti qoldaný kezinde týyndaýy múmkin qatelikterge kim jaýap beretinin aitty, dep habarlaidy Dalanews.kz.
Onyń sózinshe, meditsina – jasandy intellekt alǵash engizile bastaǵan salalardyń biri. Qazir elimizde jasandy intellekt negizinde jumys isteitin birneshe startap iske qosylǵan. Máselen, aqyldy tehnologiialar insýltti mi sýretteri arqyly anyqtaýǵa, aýyz qýysy aýrýlaryn 3D keskinder arqyly diagnostikalaýǵa kómektesedi.
"Qazirgi tańda jasandy intellekt – bul tek qural. Ol dárigerge keibir nárselerdi anyqtaýǵa kómektesedi. Máselen, dáriger baiqamaǵan jaittardy II tez anyqtap bere alady. Biraq oǵan tolyq senip, emdeýdi tolyǵymen soǵan júkteý áli erte dep oilaimyn", – dedi Sailanbaev Ortalyq kommýnikatsiialar qyzmetinde ótken brifingte.
Degenmen spikerdiń pikirinshe, diagnoz qoiý kezinde jasandy intellekttiń qatesi oryn alsa, túpkilikti jaýapkershilik dárigerge júktelýi tiis.
"Mysaly, siz bireýge taiaq laqtyrdyńyz delik. Bul jaǵdaida kiná taiaqta emes, sizde. Iaǵni jasandy intellekt – dárigerge kómektesetin qural ǵana. Al diagnoz qoiyp, em júrgizetin dárigerdiń ózi. Sondyqtan jaýapkershilik te soǵan tiesili", – dep túsindirdi Sailanbaev.
