Abai Qunanbaiulynyń 180 jyldyq mereitoiyna orai Abai oblysynda ulttyq rýhty ulyqtap, salaýatty ómir saltyn nasihattaýǵa baǵyttalǵan birqatar sporttyq is-sharalar uiymdastyrylady. Bul jóninde Abai oblysy olimpiadalyq sport túrleri boiynsha joǵary sport sheberligi mektebiniń direktory Muhit Tursynov Óńirlik kommýnikatsiialar qyzmeti alańynda ótken baspasóz máslihatynda málimdedi,- dep habarlaidy Dalanews.kz
Onyń aitýynsha, 4 tamyz kúni Semei qalasynda kúshtik ekstrim boiynsha «Semei batyry» atty ashyq týrnir ótkizý josparlanǵan. Sonymen qatar, 3–6 tamyz aralyǵynda qazaq kúresinen Qazaqstan Respýblikasy Kýbogynyń jeńimpazdary anyqtalady. Al 7 tamyz kúni Abai jolyna taǵzym retinde Semei men Qaraýyl baǵyty boiynsha 180 shaqyrymdyq ýltramarafon uiymdastyrylyp, ulttyq mura men tarihi jadyǵa qurmet kórsetiletin bolady.
Mereitoi aiasyndaǵy mańyzdy sporttyq is-sharalardyń biri – 7–10 tamyz kúnderi Abai aýdanynyń Qaraýyl aýylynda ótetin «Jeti qazyna» jobasy bolmaq. Bul týraly buǵan deiin ótken baspasóz máslihatynda Abai aýdanynyń ákimi Meiirjan Smaǵulov ta atap ótken bolatyn.
– Aýqymdy baǵdarlamada dástúrli sadaq atý, qusbegilik, tazy jarysy, toǵyzqumalaq, qazaq kúresi jáne at sporty oiyndarynyń birneshe túrleri qamtylǵan. Jarystar jorǵa jarysy, top báige, alaman báige sekildi at sportyn, sondai-aq qazaq kúresiniń «Ógiz palýan» (74 kg deiingi salmaq) jáne «Túie palýan» (90 kg-nan joǵary salmaq) sanattaryn qamtidy, – dep atap ótti spiker.
Spikerdiń aitýynsha, ulttyq sport túrlerinde jeńiske jetkenderge asa qomaqty júldeler taǵaiyndalǵan. Máselen, alaman báigede birinshi oryndy jeńip alǵan shabandozǵa naryqtyq quny 22 million teńgege deiin jetetin zamanaýi avtokólik tabystalady. Toǵyzqumalaq oiynynyń úzdigine otandyq óndiristen shyqqan Lada Granta kóligi, al qazaq kúresiniń «Túie palýan» salmaǵynda jeńiske jetken balýanǵa Chevrolet Monza markaly avtokólik syiǵa beriledi. Dástúrli sadaq atý men qusbegilik jarystarynyń jeńimpazdaryna úsh bas jylqyǵa deiin, sondai-aq jekelegen saiystarda 2 million teńgege deiingi aqshalai syiaqy men 1–5 bas aralyǵyndaǵy asyl tuqymdy jylqylar beriledi.
– Bul dodalarǵa Abai oblysynyń atynan elimizdiń jáne halyqaralyq arenalarda jeńiske jetken tájiribeli sportshylarymyz qatysady. Olar – toǵyzqumalaqtan álem jáne Aziia chempionattarynyń júldegeri Isahan Aiana, qusbegilikten Dúniejúzilik kóshpendiler oiyndarynyń kúmis júldegeri Erzat Baiqadamov, sadaq atýdan halyqaralyq saiystardyń jeńimpazdary Asqarbek Ýsabaev, Temirlan Túsiphanov jáne Elzat Maýsymbek. Sonymen qatar qazaq kúresinen Qazaqstan jáne Aziia birinshilikteriniń jeńimpazdary men júldegerleri – Didar Tuqyshev, Eshat Tursynbek, Dáýren Nýralinov syndy balýandar bozkilemge shyǵady, – dedi Muhit Tursynov.
