Sarapshylar medısına qyzmetkerleriniń kásibı merekesi qarsańynda olardyń qansha jalaqy alatynyn eseptep, óz ishindegi mamandyqtarmen salystyryp kórdi. Eń joǵary jalaqy kardıostımýlátor ornatýmen aınalysatyn mamanǵa tıesili bolsa, al az jalaqyny parazıtolog dárigerler alady eken. Odan da tómenine medbıke jáne mıkrobıolog sıaqty qosymsha baǵyttaǵy mamandar jatqyzylady, dep habarlaıdy Dalanews.kz.
2025 jyldyń İ-toqsanynda densaýlyq saqtaý jáne halyqqa áleýmettik qyzmet kórsetý salasyndaǵy nomınaldy ortasha aılyq 312,8 myń teńgeni qurady, bul - el ekonomıkanyń ortasha belgilengen jalaqysy kóleminen 26,1%-ǵa tómen kórsetish.
"Densaýlyq saqtaý men áleýmettik qyzmetter Qazaqstandaǵy eń tómen jalaqy tólenetin salalardyń biri bolyp shyqty. Bul sala eń tómen jalaqy alatyn salalardyń arasynda besinshi orynǵa jaıǵasqan. Al olardan da tómen jalaqy alatyndar – aýyl sharýashylyǵy (248,9 myń teńge), óner salasy (284,9 myń teńge), komýnaldyq qyzmet (286 myń teńge) jáne bilim berý salasynyń keıbir baǵytyndaǵy (302,4 myń teńge) qyzmetkerler. Densaýlyq saqtaý salasy eki jyldan astam ýaqyttan beri eń tómen jalaqy alatyn salalardyń qataryna turaqtanyp tur. Máselen, 2021 jyly bul sala tizimniń sońynan sanaǵanda 10-orynda turǵan edi", dep jazady Energyprom.kz.
Burynǵy jyldardaǵydaı, nomınaldy jalaqynyń eń joǵary kórsetkishi taý-ken óndirý ónerkásibi men karerlerdi qazý salasynda (981,4 myń teńge), sondaı-aq aqparat jáne baılanys (859,8 myń teńge) jáne qarjy men saqtandyrý qyzmetinde (855,5 myń teńge) tirkelgen.
Sarapshylardyń pikirinshe, medısına salasynyń atalǵan reıtıńte tómengi orynǵa qaraı "quldyraýynyń" naqty sebepteri bar. Pandemıa kezinde medısına qyzmetkerleriniń eńbekaqysy jyl saıyn 20-30%-ǵa kóterilip otyrdy. Muny 2020-2021 jyldardaǵy ındeksterdiń kúrt ósiminen baıqaýǵa bolady. Alaıda pandemıanyń sýyt kezeńi aıaqtalǵan soń jalaqy ósiminiń qarqyny aıtarlyqtaı báseńdegen.
"Naqty jalaqy ındeksine qarasaq, dál sol pandemıa jyldary dárigerler men áleýmettik qyzmetkerler jalaqysynyń arqasynda satyp alý qabileti aıqyn artqanyn seze aldy. Al 2022 jyldan bastap medısına salasynda eńbekaqynyń satyp alý qabiletiniń ósimi nebári 2,3%-ǵa kóterildi nemese múldem tómendep ketti (4,6%-ǵa deıin). Jalpy aıtqanda, medısınada qyzmetkerleri baıyp ketedi dep aıtatyn salaǵa jatpaıdy", – dep túsindiredi sarapshylar.
2019 jyldan 2024 jylǵa deıingi aralyqta nomınaldy jalaqy 133,5 myń teńgeden 315,4 myń teńgege deıin ósken, ıaǵnı 2,3 esege artqan. Alaıda ınflásıany esepke alsaq, medısına mamandary aıtarlyqtaı jalaqy ósimin sezinbegen.
Sarapshylar medısına qyzmetkerleriniń medıandyq (ortańǵy máni) jáne modaldyq (jıi kezdesetin máni) jalaqysyn da mysalǵa keltirdi.
"Bul eki kórsetkish te nomınaldy kórsetkishten aıtarlyqtaı erekshelenedi. Densaýlyq saqtaý jáne áleýmettik qyzmet kórsetý salasyndaǵy medıandyq jalaqy sońǵy birneshe jylda 2,5 ese ósti. Byltyr medısına men áleýmettik qyzmet kórsetý salalarynda medıandyq jalaqy 250,7 myń teńgeni qurasa, jalpy ekonomıka boıynsha bul kórsetkish 285,7 myń teńge boldy. Al medısına salasyndaǵylardyń modaldyq jalaqysy, kerisinshe, ekonomıkadaǵy ortasha deńgeıden eki ese joǵary, al jalpy ekonomıka boıynsha eń tómengi 97,6 myń teńgege qarsy 197,8 myń teńge túrinde de shamaly joǵary", delingen saraptamada.
2024 jyly keń taralǵan dáriger mamandyqtarynyń nomınaldy jalaqysy mynadaı deńgeıde qalyptasty:
- Terapevt – 460,2 myń teńge
- Pedıatr – 425,9 myń teńge
- Hırýrg – 505,7 myń teńge
- Kardıolog – 475 myń teńge.
Sondaı-aq sarapshylar medısına salasyndaǵy eń joǵary jáne eń tómen jalaqyǵa ıe 10 mamandyqty atady. Joǵary jalaqy alatyndardyń qataryna sırek kezdesetin, joǵary mamandanǵan jáne medısınalyq ýnıversıtettiń dıplomymen qatar qosymsha biliktilikti qajet etetin mamandar enedi.
Ótken jylǵy esepke súıensek, Qazaqstandaǵy eń joǵary jalaqy alatyn medısına qyzmetkeri ıntervensıalyq arıtmolog dáriger boldy (kardıostımýlátor ornatýmen aınalysatyn maman). Onyń ortasha jalaqysy – 1,1 mln teńge. Ekinshi orynda – embrıolog, reprodýktıvti medısına ortalyqtarynyń zerthana mamandary. EKO ortalyqtarynda bul mamandar ortasha eseppen aıyna 860,1 myń teńge alady. Úshinshi orynda – kardıohırýrgtar, olardyń aılyǵy – 768,8 myń teńge.
Eń tómen jalaqy alatyn mamandar tiziminiń basynda parazıtolog dáriger (200 myń teńge) jáne eńbek gıgıenasy dárigeri (210 myń teńge) tur. Sondaı-aq jalaqysy eń az mamandyqtar qataryna massajıst, sot-medısınalyq sarapshysy, medbıke jáne mıkrobıolog sıaqty qosymsha baǵyttaǵy mamandar jatqyzylady.
