Germaniiaǵa arman qýyp baryp, aqyry kóńili sýyp qaitqan qostanailyq Anna men Viacheslav Pontak eki eldi salystyrdy, dep habarlaidy Dalanews.kz.
Germaniiadaǵy týystaryna qonys aýdarǵanda, ómirdiń jańa kezeńin úlken úmitpen qarsy alǵan edi. Biraq, sheteldegi kúndelikti turmystyń ashy dámin tatpaiynsha, munyń jai ǵana tátti qiial ekenin túsinbepti. Alǵashqy soqqy nemis biýrokratiiasynan tidi. Viacheslavtyń turýǵa ruqsat alý qujatyn tapsyrýǵa birneshe ret baryp, ár barǵan saiyn qaǵazdaryn joǵaltqan keńse qyzmetkerlerine tap boldy. Sonyń saldarynan, «taǵy eki-úsh kún keshikkenimde qujatsyz qalyp, elden qýylatyn edim» deidi ol.
«Qazaqstanda da barlyǵy áp-sátte sheshile qoimaidy. Degenmen, bizde qujattar bir jerde – HQKO-da. Al Germaniiada qujat jinaý úshin bir kúni birneshe keńsege baryp, aiaq tozdyryp júresiń», – dep sipattaidy Viacheslav.
Germaniianyń ekinshi synaǵy Annanyń júrgizýshi kýáligin qaita alýymen bailanysty boldy. Burynǵy qujat Germaniiada jaramsyz bolyp, avto mektepke jazylyp, qaitadan emtihan tapsyrýǵa májbúr boldy. «Kóp ýaqytym, qarjym, júikem ketti» dep kúrsinedi Anna.
«Dostarymyz ben tanystarymyz Germaniiadaǵy ómirdi aýyzdarynyń sýy quryp maqtaityn. Barlyǵy jaily, ómir súrý jeńil deitin. Biraq shynaiy turmysqa tap bolǵanda múldem basqa kóriniske kýá boldyq. Kóshpei turyp, shyn ómirdiń qandai ekenin uǵa almaisyń eken», – deidi ol.
Árine, Germaniiada tabys jaqsy. Jalaqy Qazaqstanmen salystyrǵanda áldeqaida joǵary. Biraq tapqan aqshańnyń úlken bóligin salyqqa tóleisiń. Benzin, azyq-túlik, kommýnaldyq qyzmet – bári óte qymbat. Bir litr janarmaidyń ózi – 850 teńge. Shaǵyn zańbuzýshylyqtyń ózi qaltańdy qaǵyp ketedi. Nemisterdiń «tártiptiligi» sol qatal aiyppuldardan shyqqan. Bir jaǵynan jaqsy shyǵar, biraq keide bul tártip pen tárbie arasyndaǵy adami qarym-qatynasty joiyp jibergendei. Kórshiń seniń bolmashy qateligińdi baiqasa, dereý bilikke jetkizip, aiyppul saldyra salýy múmkin.
«Taǵy bir jait – Germaniia jastarynyń úlkenderge qurmetsizdigi. Avtobýsta oryn bermek túgil, qoǵamdyq kólikte, poiyzda esh qymsynbai ishimdik iship, kez kelgen jerde temeki tarta beredi. Tipti, 2024 jyldan bastap marihýanany ishinara zańdastyrǵan. Mundai dúnieler bizdiń bolmysymyzǵa múlde jat», – dep tańdanystaryn jetkizdi erli-zaiypty.
Aqyry Anna men Viacheslavqa Germaniianyń áleýmettik turaqtylyǵy da, joǵary ómir deńgeii de júrektiń tereńinde saqtalǵan týǵan jerdiń jylýyn almastyra almady.
«Endi elge qaitý úshin qujat jinaimyz. Pasportty aýystyrý kerek. Qolda bar altynnyń qadirin baǵalamaǵan ekenbiz. Bári salystyrmaly túrde tanylady. Kei nársede biz artta shyǵarmyz, biraq Qazaqstanda biz úshin mańyzdy artyqshylyqtar áldeqaida kóp», – dep túiindeidi erli-zaiypty Pontaktar.
