AQSh-tyń Denver halyqaralyq áýejaiynda jolaýshylar ushaǵy adam ólimine ákelgen qaiǵyly oqiǵaǵa tap boldy, dep dalanews.kz tilshisi kznews.kz saityna silteme jasap habarlaidy.
Oqiǵa 8 mamyr kúni keshki ýaqytta tirkelgen. Los-Andjeleske baǵyt alǵan Frontier Airlines áýe kompaniiasynyń Airbus A321 ushaǵy ushý jolaǵynda ekpin alyp kele jatqan sátte jolda júrgen adamdy qaǵyp ketken.
Amerikalyq aqparat quraldarynyń málimetinshe, zardap shekken adam oqiǵa ornynda kóz jumǵan. Sondai-aq dene bóliginiń ushaq qozǵaltqyshyna túsip ketýi saldarynan qysqa ýaqytqa órt shyqqany aityldy.
Órt sóndirýshiler jalyndy jedel túrde óshirgen. Ushaq ishinde 224 jolaýshy men jeti ekipaj múshesi bolǵan. Oqiǵadan keiin ekipaj ushýdy dereý toqtatý týraly sheshim qabyldaǵan.
Keiin áleýmettik jelide ushqysh pen dispetcher arasyndaǵy radioefir jazbasy tarady.
"Dispetcher, Frontier 4345. Biz ushý jolaǵynda toqtadyq... Bir adamdy qaǵyp kettik... Qozǵaltqyshta órt shyqty", – degen ushqyshtyń daýysy estiledi.
Artynsha ekipaj komandiri ushaq ishinde tútin paida bolǵanyn aityp, jolaýshylardy shuǵyl evakýatsiialaý qajet ekenin habarlaǵan.
Jolaýshylar úrlemeli traptar arqyly tikelei ushý jolaǵyna túsirilip, keiin arnaiy avtobýstarmen terminalǵa jetkizilgen.
Aldyn ala aqparat boiynsha, bir jolaýshy jeńil jaraqat alǵan. Borttaǵy barlyq adam meditsinalyq tekserýden ótti.
Frontier Airlines kompaniiasy oqiǵanyń sebepterin anyqtaý úshin áýejai ákimshiligi jáne qaýipsizdik qyzmetterimen birlesip jumys júrgizip jatqanyn málimdedi.
Qazir Denver politsiiasy men AQSh Ulttyq kólik qaýipsizdigi keńesi tergeý júrgizýde. Sonymen qatar áýejai aýmaǵyndaǵy qorshaýlar tekserilip, adamnyń ushý jolaǵyna qalai kirip ketkeni anyqtalyp jatyr.
