گەرمانيياعا ارمان قۋىپ بارىپ, اقىرى كٶڭٸلٸ سۋىپ قايتقان قوستانايلىق اننا مەن ۆياچەسلاۆ پونتاك ەكٸ ەلدٸ سالىستىردى, دەپ حابارلايدى Dalanews.kz.
گەرمانيياداعى تۋىستارىنا قونىس اۋدارعاندا, ٶمٸردٸڭ جاڭا كەزەڭٸن ٷلكەن ٷمٸتپەن قارسى العان ەدٸ. بٸراق, شەتەلدەگٸ كٷندەلٸكتٸ تۇرمىستىڭ اششى دەمٸن تاتپايىنشا, مۇنىڭ جاي عانا تەتتٸ قييال ەكەنٸن تٷسٸنبەپتٸ. العاشقى سوققى نەمٸس بيۋروكراتيياسىنان تيدٸ. ۆياچەسلاۆتىڭ تۇرۋعا رۇقسات الۋ قۇجاتىن تاپسىرۋعا بٸرنەشە رەت بارىپ, ەر بارعان سايىن قاعازدارىن جوعالتقان كەڭسە قىزمەتكەرلەرٸنە تاپ بولدى. سونىڭ سالدارىنان, «تاعى ەكٸ-ٷش كٷن كەشٸككەنٸمدە قۇجاتسىز قالىپ, ەلدەن قۋىلاتىن ەدٸم» دەيدٸ ول.
«قازاقستاندا دا بارلىعى ەپ-سەتتە شەشٸلە قويمايدى. دەگەنمەن, بٸزدە قۇجاتتار بٸر جەردە – حقكو-دا. ال گەرمانييادا قۇجات جيناۋ ٷشٸن بٸر كٷنٸ بٸرنەشە كەڭسەگە بارىپ, اياق توزدىرىپ جٷرەسٸڭ», – دەپ سيپاتتايدى ۆياچەسلاۆ.
گەرمانييانىڭ ەكٸنشٸ سىناعى اننانىڭ جٷرگٸزۋشٸ كۋەلٸگٸن قايتا الۋىمەن بايلانىستى بولدى. بۇرىنعى قۇجات گەرمانييادا جارامسىز بولىپ, اۆتو مەكتەپكە جازىلىپ, قايتادان ەمتيحان تاپسىرۋعا مەجبٷر بولدى. «كٶپ ۋاقىتىم, قارجىم, جٷيكەم كەتتٸ» دەپ كٷرسٸنەدٸ اننا.
«دوستارىمىز بەن تانىستارىمىز گەرمانيياداعى ٶمٸردٸ اۋىزدارىنىڭ سۋى قۇرىپ ماقتايتىن. بارلىعى جايلى, ٶمٸر سٷرۋ جەڭٸل دەيتٸن. بٸراق شىنايى تۇرمىسقا تاپ بولعاندا مٷلدەم باسقا كٶرٸنٸسكە كۋە بولدىق. كٶشپەي تۇرىپ, شىن ٶمٸردٸڭ قانداي ەكەنٸن ۇعا المايسىڭ ەكەن», – دەيدٸ ول.
ەرينە, گەرمانييادا تابىس جاقسى. جالاقى قازاقستانمەن سالىستىرعاندا ەلدەقايدا جوعارى. بٸراق تاپقان اقشاڭنىڭ ٷلكەن بٶلٸگٸن سالىققا تٶلەيسٸڭ. بەنزين, ازىق-تٷلٸك, كوممۋنالدىق قىزمەت – بەرٸ ٶتە قىمبات. بٸر ليتر جانارمايدىڭ ٶزٸ – 850 تەڭگە. شاعىن زاڭبۇزۋشىلىقتىڭ ٶزٸ قالتاڭدى قاعىپ كەتەدٸ. نەمٸستەردٸڭ «تەرتٸپتٸلٸگٸ» سول قاتال ايىپپۇلداردان شىققان. بٸر جاعىنان جاقسى شىعار, بٸراق كەيدە بۇل تەرتٸپ پەن تەربيە اراسىنداعى ادامي قارىم-قاتىناستى جويىپ جٸبەرگەندەي. كٶرشٸڭ سەنٸڭ بولماشى قاتەلٸگٸڭدٸ بايقاسا, دەرەۋ بيلٸككە جەتكٸزٸپ, ايىپپۇل سالدىرا سالۋى مٷمكٸن.
«تاعى بٸر جايت – گەرمانييا جاستارىنىڭ ٷلكەندەرگە قۇرمەتسٸزدٸگٸ. اۆتوبۋستا ورىن بەرمەك تٷگٸل, قوعامدىق كٶلٸكتە, پويىزدا ەش قىمسىنباي ٸشٸمدٸك ٸشٸپ, كەز كەلگەن جەردە تەمەكٸ تارتا بەرەدٸ. تٸپتٸ, 2024 جىلدان باستاپ ماريحۋانانى ٸشٸنارا زاڭداستىرعان. مۇنداي دٷنيەلەر بٸزدٸڭ بولمىسىمىزعا مٷلدە جات», – دەپ تاڭدانىستارىن جەتكٸزدٸ ەرلٸ-زايىپتى.
اقىرى اننا مەن ۆياچەسلاۆقا گەرمانييانىڭ ەلەۋمەتتٸك تۇراقتىلىعى دا, جوعارى ٶمٸر دەڭگەيٸ دە جٷرەكتٸڭ تەرەڭٸندە ساقتالعان تۋعان جەردٸڭ جىلۋىن الماستىرا المادى.
«ەندٸ ەلگە قايتۋ ٷشٸن قۇجات جينايمىز. پاسپورتتى اۋىستىرۋ كەرەك. قولدا بار التىننىڭ قادٸرٸن باعالاماعان ەكەنبٸز. بەرٸ سالىستىرمالى تٷردە تانىلادى. كەي نەرسەدە بٸز ارتتا شىعارمىز, بٸراق قازاقستاندا بٸز ٷشٸن ماڭىزدى ارتىقشىلىقتار ەلدەقايدا كٶپ», – دەپ تٷيٸندەيدٸ ەرلٸ-زايىپتى پونتاكتار.
