Qorǵanys ministrligin basqarǵan Rýslan Jaqsylyqov ustaldy degen aqparatty joqqa shyǵardy jáne jalǵan habar taratqandardy sotqa bermek, dep habarlaidy Dalanews.kz.
Aita keteiik, buǵan deiin birqatar BAQ-ta eks-ministr Rýslan Jaqsylyqov qamaýǵa alynǵany týraly aqparat taraǵan bolatyn.
Eń áýeli Ulysmedia jáne Elmedia portaldary óz derekkózderine súienip, Rýslan Jaqsylyqov qamaýǵa alynǵanyn habarlady.
Alaida resmi organdar bul aqparatty resmi rastamady.
Keiin Jaqsylyqovtyń qamaýda emes, óz úiinde otyrǵany anyqtaldy.
Tengrinews.kz tilshisimen telefon arqyly sóilesken ol qazir Astanadaǵy úiinde ekenin jáne otbasy múshelerimen birge túski as ishýge daiyndalyp jatqanyn aitty.
"Bul shyndyqqa janaspaidy", – dep atap ótti Jaqsylyqov.
Sonymen qatar, ol jalǵan aqparat taratqandardy sotqa beretinin jetkizdi.
Jaqsylyqov 8 maýsymda Qorǵanys ministrligi basshylyǵynan ketti. Onyń ornyna Dáýren Qosanov Qorǵanys ministri bolyp taǵaiyndaldy.
Buǵan deiin áskeri sarapshy, otstavkadaǵy polkovnik Ermek Seiitbattalov qorǵanys salasyna túbegeili ózgeris kerek ekenin málimdegen bolatyn.
Seiitbattalov Qazaqstandaǵy áskerdiń áleýetine, áýe qorǵanysyna qatysty pikir bildirdi. Sarapshy bul salany uiymdastyrý óte álsiz eken ekenin aitty.
"Meniń paiymdaýymsha, (áskerdiń áleýeti - esk.) búgingi zamannyń talabyna sai emes. Kóp jerde aityp júrmin, áskerge reforma kerek. Óte keń, óte tereń reforma kerek. 32 jylda 13 ministr (aýysty - esk.). 13 ministrdiń 30 paiyzy - azamat. Olardyń áskeri daiyndyqtan, áskeri bilimnen habary joq. Qalǵany, 9 ministr de (bul salaǵa - esk.) beiindi emes, olardyń bolǵan ýaqytyna qarasańyz, 32 jyldyń ishinde alty jarym jyl ǵana kásibi, áskeri ministrler bolǵan. Olarǵa da suraqtar bar. Sonda 20 paiyzy ǵana áskeriler bolǵan. Búgingi zamanda bizdiń qaýipsizdigimizdi (olardan - esk.) damyǵan elderdegi siiaqty, damyp jatqan elderdegi siiaqty suraýǵa bolmaidy. Nege deseńiz olardyń daiarlyǵy, uǵymy joq. Olar ondai jaýap bere almaidy.
(Áýe qorǵanysy - esk.) búgingi talapqa sai kelmeidi . San emes, sapa emes, uiymdastyrý jaǵy óte aqsap tur. Keibir men biletin óte jaqsy jigitter bar. Biraq olar júieniń ishinde júr, jeke tulǵalyq kózqarasyn kórsete almaidy. Kadrdan bastaý kerek. Kadrdy qoiatyn - basshylyq. Qorǵanys ministri, sonyń kabinetinde otyratyn adam ony biledi. Eldiń áskeri qorǵanysyn, ulttyq qaýipsizdigin bilip otyratyn, daiarlanǵan, bilikti adam kerek. Qazirgi qorǵanys ministrine kóńilim tolmaidy. Naqty aitpaimyn. (Sebebi - esk.) ofitserlik kodeks", - dedi ol Bilgen Durys arnasyna bergen suhbatynda.
Aita keteiik, eks-qorǵanys ministri Rýslan Jaqsylyqov 2021 jylǵy qyrkúiekten 2022 jyly qańtar aralyǵynda Ishki ister ministriniń orynbasary – Qazaqstan Respýblikasy Ulttyq ulanynyń bas qolbasshysy qyzmetin atqarǵan.
Al 2022 jylǵy 19 qańtardan bastap Qazaqstan Respýblikasynyń qorǵanys ministri laýazymyna kiristi.
