قورعانىس مينيسترلىگىن باسقارعان رۋسلان جاقسىلىقوۆ ۇستالدى دەگەن اقپاراتتى جوققا شىعاردى جانە جالعان حابار تاراتقانداردى سوتقا بەرمەك، دەپ حابارلايدى Dalanews.kz.
ايتا كەتەيىك، بۇعان دەيىن ءبىرقاتار باق-تا ەكس-مينيستر رۋسلان جاقسىلىقوۆ قاماۋعا الىنعانى تۋرالى اقپارات تاراعان بولاتىن.
ەڭ اۋەلى ۇلىسمەديا جانە Elmedia پورتالدارى ءوز دەرەككوزدەرىنە سۇيەنىپ، رۋسلان جاقسىلىقوۆ قاماۋعا الىنعانىن حابارلادى.
الايدا رەسمي ورگاندار بۇل اقپاراتتى رەسمي راستامادى.
كەيىن جاقسىلىقوۆتىڭ قاماۋدا ەمەس، ءوز ۇيىندە وتىرعانى انىقتالدى.
Tengrinews.kz تىلشىسىمەن تەلەفون ارقىلى سويلەسكەن ول ءقازىر استاناداعى ۇيىندە ەكەنىن جانە وتباسى مۇشەلەرىمەن بىرگە تۇسكى اس ىشۋگە دايىندالىپ جاتقانىن ايتتى.
"بۇل شىندىققا جاناسپايدى"، – دەپ اتاپ ءوتتى جاقسىلىقوۆ.
سونىمەن قاتار، ول جالعان اقپارات تاراتقانداردى سوتقا بەرەتىنىن جەتكىزدى.
جاقسىلىقوۆ 8 ماۋسىمدا قورعانىس مينيسترلىگى باسشىلىعىنان كەتتى. ونىڭ ورنىنا داۋرەن قوسانوۆ قورعانىس ءمينيسترى بولىپ تاعايىندالدى.
بۇعان دەيىن اسكەري ساراپشى، وتستاۆكاداعى پولكوۆنيك ەرمەك سەيىتباتتالوۆ قورعانىس سالاسىنا تۇبەگەيلى وزگەرىس كەرەك ەكەنىن مالىمدەگەن بولاتىن.
سەيىتباتتالوۆ قازاقستانداعى اسكەردىڭ الەۋەتىنە، اۋە قورعانىسىنا قاتىستى پىكىر ءبىلدىردى. ساراپشى بۇل سالانى ۇيىمداستىرۋ وتە ءالسىز ەكەن ەكەنىن ايتتى.
"مەنىڭ پايىمداۋىمشا، (اسكەردىڭ الەۋەتى - ەسك.) بۇگىنگى زاماننىڭ تالابىنا ساي ەمەس. كوپ جەردە ايتىپ ءجۇرمىن، اسكەرگە رەفورما كەرەك. وتە كەڭ، وتە تەرەڭ رەفورما كەرەك. 32 جىلدا 13 مينيستر (اۋىستى - ەسك.). 13 ءمينيستردىڭ 30 پايىزى - ازامات. ولاردىڭ اسكەري دايىندىقتان، اسكەري بىلىمنەن حابارى جوق. قالعانى، 9 مينيستر دە (بۇل سالاعا - ەسك.) بەيىندى ەمەس، ولاردىڭ بولعان ۋاقىتىنا قاراساڭىز، 32 جىلدىڭ ىشىندە التى جارىم جىل عانا كاسىبي، اسكەري مينيسترلەر بولعان. ولارعا دا سۇراقتار بار. سوندا 20 پايىزى عانا اسكەريلەر بولعان. بۇگىنگى زاماندا ءبىزدىڭ قاۋىپسىزدىگىمىزدى (ولاردان - ەسك.) دامىعان ەلدەردەگى سياقتى، دامىپ جاتقان ەلدەردەگى سياقتى سۇراۋعا بولمايدى. نەگە دەسەڭىز ولاردىڭ دايارلىعى، ۇعىمى جوق. ولار ونداي جاۋاپ بەرە المايدى.
(اۋە قورعانىسى - ەسك.) بۇگىنگى تالاپقا ساي كەلمەيدى . سان ەمەس، ساپا ەمەس، ۇيىمداستىرۋ جاعى وتە اقساپ تۇر. كەيبىر مەن بىلەتىن وتە جاقسى جىگىتتەر بار. ءبىراق ولار جۇيەنىڭ ىشىندە ءجۇر، جەكە تۇلعالىق كوزقاراسىن كورسەتە المايدى. كادردان باستاۋ كەرەك. كادردى قوياتىن - باسشىلىق. قورعانىس ءمينيسترى، سونىڭ كابينەتىندە وتىراتىن ادام ونى بىلەدى. ەلدىڭ اسكەري قورعانىسىن، ۇلتتىق قاۋىپسىزدىگىن ءبىلىپ وتىراتىن، دايارلانعان، بىلىكتى ادام كەرەك. قازىرگى قورعانىس مينيسترىنە كوڭىلىم تولمايدى. ناقتى ايتپايمىن. (سەبەبى - ەسك.) وفيسەرلىك كودەكس"، - دەدى ول Bilgen Durys ارناسىنا بەرگەن سۇحباتىندا.
ايتا كەتەيىك، ەكس-قورعانىس ءمينيسترى رۋسلان جاقسىلىقوۆ 2021 جىلعى قىركۇيەكتەن 2022 جىلى قاڭتار ارالىعىندا ىشكى ىستەر ءمينيسترىنىڭ ورىنباسارى – قازاقستان رەسپۋبليكاسى ۇلتتىق ۇلانىنىڭ باس قولباسشىسى قىزمەتىن اتقارعان.
ال 2022 جىلعى 19 قاڭتاردان باستاپ قازاقستان رەسپۋبليكاسىنىڭ قورعانىس ءمينيسترى لاۋازىمىنا كىرىستى.
