QR EHÁQM memlekettik eńbek inspektsiiasy komitetiniń tóraǵasy Erbolat Ábilhatin Qostanai ákiminiń usynysyna qatysty pikir bildirdi. Qala basshysy balalar qaýipsizdigin baqylaýda ruqsat etilmegen jaǵajailardy sholý úshin kezekshilikke muǵalimderdi tartý kerektigin aitqan edi, dep habarlaidy Dalanews.kz.
Spiker pedagogtardy bóten jumysqa tartýǵa múldem jol berilmeitinin atap ótti.
"Biz óz ustanymymyzdy bildirdik, bul zańmen bekitilgen nárse. Qazirgi ýaqytta muǵalimder negizgi júktemeden bosatylyp, jazǵy demalys kezeńiniń bastalýyn eskere otyryp, eńbek inspektsiiasy tarapynan muǵalimderdi óz fýnktsiiasynan tys mindetterge tartýǵa jol bermeý máselesi boiynsha barlyq deńgeidegi mektep direktorlary men bilim basqarmalaryna eskertý jasaldy. Osy baǵytta jumystar bastaldy", – dep sózin tolyqtyrdy Erbolat Ábilhatin.
Ol, atap ótkendei, tipti pedagogtardyń mektepterdi syrlaý jáne sharýashylyq jumystardy oryndaýy da múldem qoldaýǵa jatpaidy.
"Biz eńbek inspektsiialaryna naqty nusqaýlar berdik: mundai faktiler anyqtalǵan kezde bilim basqarmalary men mektep direktorlary jumys berýshiler retinde jaýapkershilikke tartylatyn bolady. Qostanaidaǵy fakt baqylaýǵa alyndy. Biz óńirdegi eńbek inspektsiialaryna atalǵan jaǵdaida muǵalimderdiń jaǵajailardaǵy kezekshilikke jáne basqa da bóten jumys túrlerine tartý boiynsha kelip túsip jatqan aryzdar bolsa, tekserý júrgizýdi tapsyrdyq. Aryz túsip jatsa, tiisti sharalar qabyldanady jáne nusqamalar beriledi", - dedi Erbolat Ábilhatin.
Onyń aitýynsha, 2025 jyldyń 15 maýsymynan bastap mundai jaǵdailardyń aldyn alý jumystary da bastalady.
Buǵan deiin saitymyzda "Balalar sýǵa ketip jatyr". Qostanai ákimi pedagogtardy jazda kezekshilikke shyǵarýdy usyndy" degen material jariialanǵan bolatyn.
