Almaty oblysynda Qazaqstan Respýblikasynyń jańa Konstitýtsiiasynyń resmi túrde kúshine enýine orai «Ata Zań – Qýatty Qazaqstan!» atty konferentsiia ótti. Konferentsiiaǵa oblys ákimi Marat Sultanǵaziev tóraǵalyq etip, máslihat depýtattary, qoǵamdyq keńes músheleri, ziialy qaýym ókilderi, quqyq qorǵaý organdarynyń qyzmetkerleri, kásipkerler, úkimettik emes uiymdar men etnomádeni birlestikterdiń músheleri jáne jastar qatysty. Olar engizilgen jańashyldyqtardyń mańyzy, qoǵamnyń damýyna tigizetin róli men yqpaly týraly pikir almasty, dep habarlaidy dalanews.kz.
Marat Eleýsizuly jiynǵa jinalǵandardy jańa Konstitýtsiianyń zańdy kúshine enýimen quttyqtap, jańa Ata Zań elimizdegi saiasi jáne memlekettik basqarý júiesin túbegeili jańǵyrtqanyn aitty.
«Jańa Konstitýtsiia azamattardyń memlekettik basqarýdaǵy rólin kúsheitip, memlekettik institýttardyń jaýapkershiligin arttyrýǵa, adam quqyqtaryn qorǵaýdy nyǵaitýǵa baǵyttalǵan. Prezident atap ótkendei, «Zań men Tártip – memleket saiasatynyń ǵana emes, ult bolmysynyń ajyramas bóligi bolýy tiis». Sondai-aq Memleket basshysynyń «Tazalyq uǵymy ultymyzdyń bolmys-bitimine tán asyl qasietke, qoǵamdyq máni zor qundylyqqa ainalyp jatyr. «Taza Qazaqstan» tujyrymdamasy – sonyń aiqyn kórinisi» degen sózin negizge ala otyryp oblysymyzdyń barsha turǵyndaryn «Taza Qazaqstan» aktsiiasyna belsendi atsalysýǵa shaqyramyn. Bul oi-sananyń tazalyǵymen keletin dúnie. Búgingi kúnge deiin oblysymyzda 104 myńǵa jýyq aǵash otyrǵyzyldy jáne 440 myń adam belsendilik tanytyp, jobanyń janashyryna ainaldy», – dedi aimaq basshysy.
Sondai-aq Jańartylǵan Konstitýtsiiada bilim berý men ǵylym memlekettiń strategiialyq basymdyǵy retinde aiqyndalǵanyn, tegin orta bilim alýǵa beriletin kepildikter kúsheitilip, alǵash ret konstitýtsiialyq deńgeide bekitilgenin jetkizdi. Oblys ákiminiń aitýynsha, biyl óńirde bilim berý salasyna 409,8 mlrd teńge bólingen. Oblysta 1 748 bilim berý uiymy jumys isteidi, onda 470 myńnan astam bala bilim alyp, tárbielenýde. Sońǵy úsh jylda oblysta 69 mektep boi kóterdi. 2025-2027 jyldary 91 mektepke kúrdeli jóndeý júrgizý josparlanǵan. Biyl 11 nysanda jóndeý jumystary jalǵasyp, 2026-2028 jyldary 11 jańa mektep salý josparlanǵan.
«Jańa Konstitýtsiianyń qaǵidattary adamdardyń kúndelikti ómirindegi naqty ózgerister arqyly kórinis tabýy qajettigin atap ótkim keledi. Bul árbir memlekettik qyzmetshiden joǵary jaýapkershilikti talap etedi. Formalizmge, biýrokratiiaǵa jáne azamattardyń máselelerine nemquraily qaraýǵa jol joq. Árbir basshy óz salasynda ózgeristerdiń bastamashysy bolyp, qabyldanǵan sheshimderdiń naqty nátijesine jaýap berýi tiis», – dedi Marat Eleýsizuly.
Sondai-aq elimizdegi buryn-sońdy bolmaǵan, eń úlken, eń aýqymdy joba – «Alataý siti» shahary Almaty oblysy aýmaǵynda boi kóterip kele jatqanyn aityp, jobanyń sátti júzege asýyna jan-jaqty kirisý kerektigin jetkizdi.
Oblystyq Qoǵamdyq keńestiń tóraǵasy Qazybek Dáýtáliev jańa Konstitýtsiianyń memlekettik basqarý júiesin jańǵyrtyp, zań ústemdigin nyǵaitýǵa jáne azamattardyń memleket isine qatysý múmkindigin keńeitýge jol ashqanyn tilge tiek etti. Onyń aitýynsha, Prezident bastamasymen júzege asyrylyp jatqan «Halyq únine qulaq asatyn memleket» tujyrymdamasy aiasynda qoǵamdyq keńester men Halyq keńesiniń róli artyp keledi. Bul institýttar memlekettik organdar men azamattyq qoǵam arasyndaǵy tiimdi dialog ornatyp, turǵyndardyń usynystary men pikirlerin sheshim qabyldaý protsesine engizýge, qoǵamdyq baqylaýdy kúsheitýge yqpal etýde.
Konferentsiiada kásipkerler qaýymy atynan sóz sóilegen «Dáýlet-Beket» sharýa qojalyǵynyń basshysy Sydyq Daýletov eldegi ekonomikalyq reformalar óndiristi damytýǵa, investitsiia tartýǵa jáne jańa jumys oryndaryn ashýǵa baǵyttalǵanyn aitty.
Almaty oblysynyń belsendi jasy Alina Kan jańa Konstitýtsiianyń zańdy kúshine enýi Qazaqstannyń jańa damý kezeńiniń bastalǵanyn bildiretin tarihi oqiǵa ekenine toqtaldy.
«Jańa Ata Zańda zań ústemdigi, ádilettilik, qoǵamdyq kelisim, adam quqyqtary men bostandyqtaryn qorǵaý, azamattardyń teń múmkindikteri men bolashaq urpaq aldyndaǵy jaýapkershilik siiaqty irgeli qundylyqtar bekitilgen. Bul qaǵidattar árbir azamattyń, ásirese jastardyń ómirlik ustanymyna ainalýǵa tiis», – dedi Alina Kan.
Konferentsiia sońynda birqatar azamatqa Memleket basshysynyń atynan Jańa Konstitýtsiianyń arnaiy basylymy saltanatty túrde tabystaldy. Sondai-aq siiasy keppegen 2200 dana Ata Zań oblys aýmaǵyndaǵy barlyq memlekettik mekemeler men kitaphanalarǵa taratyldy.
