"Brigada" serialy men "Býmer" filmindegi rólderi arqyly tanylǵan akter Aleksandr Vysokovskii Oka ózeninen óli kúiinde tabyldy. 62 jastaǵy óner iesiniń denesin izdeý jumystary bastalǵannan keiin bir táýlikten soń súńgýirler tapqan, dep habarlaidy dalanews.kz.
LIFE málimetinshe, oqiǵaǵa deiin Vysokovskii 17 jastaǵy ulymen birge Pýshinskaia kosa mańyna balyq aýlaýǵa barǵan. Bir sátte ekeýi eki jaqqa ketip qalǵan: akter jaǵalaý boiymen ári qarai júrip, keiin qaityp oralmaǵan. Izdeý jumystary nátije bermegen soń, uly bolǵan jaǵdaidy týystaryna habarlaǵan.
Izdeý operatsiiasyna qutqarýshylar men súńgýirler qatysqan. Olar ózenniń qiyn ári qoljetimsiz ýchaskelerin de teksergen.
Aldyn ala málimet boiynsha, Aleksandr Vysokovskii sýǵa batyp ketken bolýy múmkin. Qaiǵyly jaǵdaidyń naqty sebepteri anyqtalyp jatyr.
