Túrkistan oblysynda Keńes Odaǵynyń batyrlary men Ekinshi dúniejúzilik soǵysy ardagerleriniń esimderin ulyqtaý jumystary jalǵasyp jatyr. Biyl jyl sońyna deiin 47 kóshege maidangerlerdiń aty berilmek,- dep habarlaidy Dalanews.kz
Respýblika boiynsha esimderi ulyqtalýǵa tiis 500 ardagerdiń ishinde 47-si Túrkistan oblysynan usynyldy. Irikteýdiń basty talaptarynyń biri olar keminde bir ordenmen marapattalǵan bolýy kerek. Osy kriteriige sáikes oblystan 122 ardagerdiń esimi ministrlikke usynylyp, ishinen 47-i maquldandy.
— Qazirgi ýaqytta aýdandyq jáne qalalyq ákimdikter ardagerlerdiń esimderin kóshelerge berý jumysyn júrgizip jatyr. Bul úderis Mádeniet jáne sport ministriniń 2023 jylǵy 1 shildedegi № 211 buiryǵyna sáikes júzege asyrylyp keledi. Atalǵan buiryqta eldi mekenderdiń quramdas bólikterine ataý berý, qaita ataý nemese transkriptsiiasyn naqtylaý kezinde jergilikti halyqtyń pikirin eskerý tártibi aiqyndalǵan, — delingen Túrkistan oblysynyń mádeniet basqarmasynyń habarlamasynda.
Sonymen qatar, 2020 jylǵy 26 mamyrdaǵy № 149 buiryqpen bekitilgen «Memorialdyq taqtalar ornatýǵa ruqsat berý» memlekettik qyzmet kórsetý qaǵidalaryna sáikes, jergilikti ákimdikter tiisti kósheler boiyna ardagerler jaily aqparat beretin taqtaishalar men memorialdyq belgiler ornatý jumystaryn júrgizetin bolady.
