Memleket basshysy EQYU-nyń is basyndaǵy tóraǵasy Elina Valtonendi qabyldady. Qasym-Jomart Toqaev Uiymdy aimaqtyq jáne jahandyq qaýipsizdik salasyndaǵy kúrdeli kezeńde basqaryp otyrǵan Elina Valtonenniń qyzmetine qoldaý bildirdi,- dep habarlaidy Dalanews.kz Aqordaǵa silteme jasap.
– Biyl biz Helsinki qorytyndy aktisiniń 50 jyldyǵyn atap ótemiz. Jarty ǵasyr ótse de bul qujat egemendik, aýmaqtyq tutastyq jáne adam quqyqtaryn qurmetteý qaǵidattaryn bekite otyryp, eýropalyq qaýipsizdiktiń negizi bolyp qala bermek. Qazaqstan osy qundylyqtardy berik ustanady, – dedi Qasym-Jomart Toqaev.
Prezident qazaq-fin bailanystarynyń jai-kúiine joǵary baǵa berdi. Finliandiiany Astananyń Skandinaviia aimaǵyndaǵy burynnan kele jatqan seriktesi dep atap, qarym-qatynasty odan ári jandandyrýǵa ázir ekenin málim etti.
Elina Valtonen EQYU Qazaqstanmen jáne Ortalyq Aziiamen bailanysty damytýǵa basa mán beretinine toqtaldy.
– Qazaqstannyń halyqaralyq arenadaǵy abyroiyn bekitýge úlken kúsh-jiger jumsap otyrsyz. Sonyń arqasynda elińiz ózin aimaqta jáne álemde yqpaldy orta derjava retinde tanytty. Qazaqstan EQYU sekildi uiymdardyń jumysyna belsendi atsalysý arqyly jahandyq deńgeidegi bedelin nyǵaita beredi. Biz Sizdiń qazirgidei kúrdeli kezeńdegi, ásirese, ekonomika jáne ekologiia salalaryndaǵy qyzmetińizdi joǵary baǵalaimyz. EQYU-nyń Astanadaǵy baǵdarlamalyq keńsesimen yntymaqtastyq aitarlyqtai tabysty damyp keledi, – dedi EQYU-nyń is basyndaǵy tóraǵasy.
Kezdesý sońynda Memleket basshysy Finliandiia Prezidenti Aleksandr Stýbbqa sálem joldap, eki el arasyndaǵy dostyq pen yntymaqtastyqty nyǵaitý úshin tyǵyz yqpaldastyqqa daiyn ekenin rastady.
