Áielin uryp-soqty dep aiyptalǵan burynǵy diplomat Sáken Mamashtyń soty bastaldy. Alǵashqy otyrystan keiin jýrnalisterdiń aldyna shyqqan aiyptalýshynyń aǵasy Nurjan Mamashtyń aitýynsha, bul istiń astarynda qarjy máselesi jatyr,- dep habarlaidy Dalanews.kz
Nurjan Mamash inisi Sáken Mamash pen onyń burynǵy jary Karina Gosmannyń aralarynda on jyldan astam ýaqyt boiy eshbir urys-keris bolmaǵanyn alǵa tartty.
«Olar 11 jyl birge turdy. Osy ýaqytqa deiin otbasynda zorlyq-zombylyq jaǵdaiy tirkelgen emes. Qos perzent súidi. Belgiiada tórt jyl, Birikken Arab Ámirlikterinde tórt jyl elshilik qyzmette boldy. Burynǵy kelinimiz eshqashan shaǵym aityp, otbasy ishinde daý shyǵarǵan emes. Demalystaryn únemi shetelde ótkizetin, turmystary da jaily bolatyn», – dedi ol.
Sondai-aq, Nurjan Mamashtyń aitýynsha, inisi Sáken men burynǵy kelini Karina alǵash tanysqanda, áleýmettik jelide boijetkenniń atynan onyń anasy sóilesken.
«Jas kezinde mail.ru jelisi arqyly sóileskende Karinanyń ornyna anasy Janar jazyp otyrǵan. Bizde buǵan dálel bar. Áleýmettik jelilerdegi hattarynda muny týystarynyń ózderi de moiyndaidy. Anasynyń maqsaty túsinikti – qyzy jaqsy, baqýatty jerge turmysqa shyqsyn degen. Máseleniń túp-tamyry aqshaǵa tirelip tur», – dedi ol jýrnalisterge bergen suhbatynda.
Onyń sózinshe, Sáken Mamash otbasynan bólek, qaiyrymdylyqpen de ainalysyp kelgen.
«Inim Shymkenttegi balalar ortalyqtaryna kómek jibergen, turmysy tómen otbasylarǵa turaqty túrde qarajat aýdaryp turǵan. Qaiyrymdylyqqa jumsaǵan aqshasy da otbasynda janjalǵa sebep bolýy múmkin», – dep qosty Nurjan Mamash.
Eske sala keteiik, biyl 4 sáýirde Sáken Mamash burynǵy jubaiyn uryp-soqty degen kúdikpen qamaýǵa alynǵan. Oǵan deiin eks-diplomattyń burynǵy áieli Karina Mamash video arqyly 10 jyl boiy kúieýinen zorlyq kórgenin málimdegen bolatyn. Osyǵan bailanysty diplomat elshilik qyzmetinen shuǵyl shaqyrylyp, is qozǵalǵan edi. Erli-zaiyptylar byltyr kúzde resmi túrde ajyrasqan.
Buǵan deiin eks-diplomat Sáken Mamashanyń isi boiynsha sot otyrysy jartylai jabyq rejimde ótetinin jazǵan bolatynbyz.
Jýrnalister otyrystyń basynda – protsessýaldyq máseleler qaralatyn sátke deiin qatysa alady. Alaida istiń egjei-tegjeii baspasózsiz qaralady. Úkim ashyq túrde jariialanady.
