"Qazaqstan temir joly" ulttyq kompaniiasy top-menedjerleriniń 2024 jylǵy tabysy týraly aqparat jariia boldy, dep habarlaidy Dalanews.kz.
Qazaqstan qor birjasynda (KASE) jariialanǵan qarjylyq esepke sáikes, KTJ-nyń basqarma músheleri men direktorlar keńesiniń quramyndaǵy 18 adam 2024 jyly jalpy somasy 816 mln teńge tabys tapqan. Bul somaǵa salyq, áleýmettik tólemder, paidalanylmaǵan eńbek demalystarynyń rezervi men kompaniianyń jyldyq kórsetkishterine bailanysty beriletin qosymsha syiaqylar kiredi.
Ortasha eseppen alǵanda, kompaniianyń árbir top-menedjeri bir jylda shamamen 45,3 mln teńge alǵan. Ailyq kórsetkishke bólgende, bul – shamamen 3,8 mln teńge degen sóz.
Degenmen, 2023 jylmen salystyrǵanda KTJ basshylyǵynyń tabysy birshama azaiǵan. Bir jyl buryn ulttyq kompaniianyń basqarmasy men direktorlar keńesinde 16 adam qyzmet etip, olardyń jyldyq tabysy 790 mln teńgeni quraǵan edi. Ai saiynǵy ortasha tabystary byltyr sál joǵary – 4,1 mln teńge bolǵan.
Kompaniianyń qarjy esebinde KTJ-nyń jalpy aktivteri 2024 jyly 5,9 trln teńgege jetkeni kórsetilgen. Ulttyq kompaniia byltyr 2,1 trln teńge tabys taýyp, taza paidasy 160,8 mlrd teńgeni quraǵan.
Aita ketý kerek, buǵan deiin "Qazaqstan temir joly" kompaniiasy IPO-ǵa shyǵýǵa daiyndalyp jatqany habarlanǵan edi. Kompaniia aktsiialaryn birjada jariia túrde saýdaǵa shyǵarý máselesi talqylanýda. IPO barysynda investorlarǵa KTJ múlkiniń qandai úlesi usynylatyny týraly, ázirge naqty málimet joq.
