"قازاقستان تەمىر جولى" ۇلتتىق كومپانياسى توپ-مەنەدجەرلەرىنىڭ 2024 جىلعى تابىسى تۋرالى اقپارات جاريا بولدى، دەپ حابارلايدى Dalanews.kz.

قازاقستان قور بيرجاسىندا (KASE) جاريالانعان قارجىلىق ەسەپكە سايكەس، كتج-نىڭ باسقارما مۇشەلەرى مەن ديرەكتورلار كەڭەسىنىڭ قۇرامىنداعى 18 ادام 2024 جىلى جالپى سوماسى 816 ملن تەڭگە تابىس تاپقان. بۇل سوماعا سالىق، الەۋمەتتىك تولەمدەر، پايدالانىلماعان ەڭبەك دەمالىستارىنىڭ رەزەرۆى مەن كومپانيانىڭ جىلدىق كورسەتكىشتەرىنە بايلانىستى بەرىلەتىن قوسىمشا سىياقىلار كىرەدى.

ورتاشا ەسەپپەن العاندا، كومپانيانىڭ ءاربىر توپ-مەنەدجەرى ءبىر جىلدا شامامەن 45،3 ملن تەڭگە العان. ايلىق كورسەتكىشكە بولگەندە، بۇل – شامامەن 3،8 ملن تەڭگە دەگەن ءسوز.

دەگەنمەن، 2023 جىلمەن سالىستىرعاندا كتج باسشىلىعىنىڭ تابىسى ءبىرشاما ازايعان. ءبىر جىل بۇرىن ۇلتتىق كومپانيانىڭ باسقارماسى مەن ديرەكتورلار كەڭەسىندە 16 ادام قىزمەت ەتىپ، ولاردىڭ جىلدىق تابىسى 790 ملن تەڭگەنى قۇراعان ەدى. اي سايىنعى ورتاشا تابىستارى بىلتىر ءسال جوعارى – 4،1 ملن تەڭگە بولعان.

كومپانيانىڭ قارجى ەسەبىندە كتج-نىڭ جالپى اكتيۆتەرى 2024 جىلى 5،9 ترلن تەڭگەگە جەتكەنى كورسەتىلگەن. ۇلتتىق كومپانيا بىلتىر 2،1 ترلن تەڭگە تابىس تاۋىپ، تازا پايداسى 160،8 ملرد تەڭگەنى قۇراعان.

ايتا كەتۋ كەرەك، بۇعان دەيىن "قازاقستان تەمىر جولى" كومپانياسى IPO-عا شىعۋعا دايىندالىپ جاتقانى حابارلانعان ەدى. كومپانيا اكسيالارىن بيرجادا جاريا تۇردە ساۋداعا شىعارۋ ماسەلەسى تالقىلانۋدا. IPO بارىسىندا ينۆەستورلارعا كتج مۇلكىنىڭ قانداي ۇلەسى ۇسىنىلاتىنى تۋرالى، ازىرگە ناقتى مالىمەت جوق.