Bloger Saıa Manarbekqyzy Almatydaǵy Kóktóbe demalys aımaǵyndaǵy qyzmet qunynyń qymbattaǵanyn synǵa alyp, otbasylyq demalys kópshilikke qoljetimsiz bolyp bara jatqanyn atap ótti, dep habarlaıdy Dalanews.kz.

Onyń sózinshe, Kóktóbede kóptegen qyzmet aqyly ári baǵasy joǵary.

“Kóktóbege kelip, baǵalardy kórip, jaǵamdy ustadym. Munda bári qymbat, bári aqyly. Tipti dárethanaǵa kirý quny - 100 teńge”, - dedi ol.

Saıa Manarbekqyzy ásirese otbasymen keletinder úshin shyǵyn kólemi aıtarlyqtaı artatynyn alǵa tartty. Onyń málimetinshe, jeke kólikpen joǵary kóterilý quny — shamamen 25 myń teńge. Tipti kólikti tómende qaldyryp, marshrýtpen kóterilgen jaǵdaıda da birneshe adamǵa bul edáýir qymbatqa túsedi.

“Mysaly, bes-alty adamnan turatyn otbasy úshin eki baǵytqa jol aqysy shamamen 4 myń teńgeden asady. Bul - qarapaıym serýen úshin qymbat”, - dedi bloger.

Sondaı-aq ol aspaly jol qyzmetiniń baǵasy da joǵary ekenin atap ótti.

“Bir baǵytqa bılet shamamen 6 myń, al eki baǵytqa 10 myń teńge. Bul bizdiń azamattar úshin óte qymbat”, - dedi ol.

Jýrnalıs buǵan deıin de Shymbulaqtaǵy baǵa saıasaty týraly másele kótergenin eske salyp, Qazaqstan azamattary men shetel azamattary úshin eki túrli tarıf engizýdi usyndy.

“Kóp elde qoldanylatyn eki tarıf júıesin engizý kerek dep oılaımyn. Óz azamattarymyzǵa demalys oryndary qoljetimdi bolýy tıis”, - dedi Saıa Manarbekqyzy.

Onyń pikirinshe, baǵanyń qymbattaýy saldarynan keıbir otbasylar mundaı oryndarǵa barýdan bas tartyp, úıde qalýǵa májbúr.